Bakı Metropoliteni: Sərnişin qatarda şüşəni qırıb
Ötən gecə metronun “Qara Qarayev” stansiyasında birinci vaqonun şüşəsinin sınaraq sərnişinin başına düşməsi barədə məlumat yayılıb.
“Bakı Metropoliteni” Qapalı Səhmdar Cəmiyyəti həmin hadisəyə aydınlıq gətirib. Qurumun mətbuat xidmətinin rəhbəri Nəsimi Paşayev bildirib ki, yayılan məlumat həqiqəti əks etdirmir. Belə ki, hadisə “Xalqlar Dostluğu” stansiyasında qatarda bir nəfərin nəfəsliyi açmaq istəməsi zamanı baş verib:
“Bu zaman o nəfəsliyi möhkəm dartıb və nəfəsliyin şüşəsini qırıb. Sərnişin maşinistə yaxınlaşaraq etiraf edib ki, nəfəsliyi açmaq istərkən şüşəni qırıb. Qatarın şüşəsinin qırılması, kiminsə başına düşməsi barədə yayılan məlumatlar tam əsassızdır”.
