\"Birinci zopanı yeməyə hazır olduğumu bəyan edirəm\"

"Azərbaycan iqtidarı nəinki Konstitusiyanı dəyişə bilir, seçkini də istədiyi formada keçirir, qanunları da istədiyi formada qəbul edir və dəyişiklik aparır, o cümlədən ictimai rəyi nəzərə alaraq addım atmalı olduğu məsələlərdə belə təkbaşına qərar verir. Səbəb isə məlumdur. Müxalifət çox zəifdir. Müxalifət çox zəiflədilib. Müxalifətin hakimiyyətin davranışını və siyasətini dəyişmək üçün gücü və resursu yox dərəcəsindədir".

Bunu Ölkə.Az-a Azərbaycan Xalq Cəbhəsi Partiyasının sədri Razi Nurullayev deyib. Sədr bildirib ki, bunun bir neçə səbəbləri var:

"Xalq müxalifət və iqtidardan uzaq düşüb. Xalq bu gün nə iqtidarın, nə də müxalifətin yanındadır. Çünki, zaman-zaman aldadılıb, kimlərinsə siyasi ömrünü uzatmaq üçün istifadə edilib, onilliklər boyu ümid edib və o ümidlər sındırılıb, yerlə-yeksan edilib, talan edilib, nəhayət məhv edilib. Bu gün baxsaq, normal münasibətləri olan siyasətçilər yox dərəcəsindədir.

Hər kəs bir-birinə şübhə ilə baxır, bir-birinə yalan danışır, siyasətində də kimlərəsə bağlıdır, bəziləri isə tapşırıqlar yerinə yetirir. Belə olan halda, xalqın da inamı qırılır. Xalq müxalfətə dəstək vermədiyinə görə, bütün siyasi məsələlərə laqeyd qaldığına görə də iqtidar istədiyi formada Konstitusiyanı dəyişdirə bilir.

“Konstitusiya dəyişikliyinə mane olmaq üçün mitinq məsələsi ortaya atılacaq” deyən AXCP sədri qeyd edib ki, bəlkə də kimlərsə 1000 nəfər yığıb siyasi şou göstərəcək, amma mahiyyət dəyişməyəcək:

"Əslində, elə bu şounun göstərilməsi ziyanlıdır. Xalqı arxayın salırıq. O düşünür ki, mitinq edirlər və xalqı ayağa qaldıracaqlar. Nə baş verir. Mitinq "mən ölüm-sən öl" taktikası ilə az sayda təşkil olunur və sonra da xalq günahlandırılır ki, dəstək vermədilər. Əgər siyasi partiya altımış, yetmiş min üzvünün olduğunu deyirsə və on min, iyirmi min adamı etiraz mitinqinə çıxara bilmirsə, o zaman xalq mitinqə dəstək verməyəcək. Öz üzvünü çıxara bilmədiyin mitinqə xalq qoşulmaz. Mən bu həqiqəti dərk edirəm və mitinq təşkil etmək fikrindən qaçıram. Çünki, yalandan şou düzəltmək, artistlik etmək və xalqın başının altına yastıq qoymaq fikrim yoxdur.

Qoy xalq bu həqiqəti görsün və silkələnsin. Məhz, xalqın ayılması və silkələnməsi üçün mitinq təşkil etmək fikrimiz yoxdur. Ümid yeri olub, sonra yaraya çevrilmək fikrimiz yoxdur. Bu xalqın belində qara yaralıq edənlər kifayət qədərdir.

Xalq ayılanda və zopadan qorxmayanda görəcəyik. Təbii ki, o zaman birinci zopanı yeməyi üzərimə götürməyə hazır olduğumu bəyan edirəm. Xalqın önündə gedəcəm və liderliyi də ən ağır məqamda bütün təhlükə və riskləri ilə üzərimə götürəcəm.

Beynəlxalq reaksiyaya gəldikdə isə bu daha çox daxili müqavimət faktorundan asılıdır. Onlar onsuz da narahatlıqlarını dilə gətirəcəklər və məsələ bundan o yana getməyəcək. Onlar nə edə bilər ki? Nəzəri cəhətdən qanuni şəkildə xalqın və zəhmətkeşlərin tələbi ilə referendum keçirilir və Konstitusiya dəyişdirilir. Öncəki seçkilərdə nəticələrə nə təsir oldu ki, indi nə ola.

Konstitusiya dəyişdiriləcək. YAP bunu kafasına qoyub və edəcəkdir. Beynəlxalq təşkilatlardan isə umu-küsü etməyə dəyməz. Biz burada nə müqavimət təşkil edə bildik ki, onlarda bizə dəstək dursun?".

Ölkə.Az