![Sakinləri içərisində ola-ola sökülən \](https://olke.az/photo/770x415/2016/08/04/120777.jpg "Sakinləri içərisində ola-ola sökülən \")
Sakinləri içərisində ola-ola sökülən \"alimlər binasından\"
Gecə saat 23:30. Gəlmişik, evinizi sökək.
Dünən gecə Bakı şəhər, Yasamal rayon, Şərifzadə 33 ünvanında yerləşən "alimlər binası"nın sakinləri ekskovatorun səsinə küçəyə axışıblar.
Bina sakinləri həyətə düşəndə artıq binanın daşla hasarlanmış bir hissəsinin uçurulduğunu görürlər. Bunu görən bina sakinləri ekskovatorun qarşısına keçərək onu birtəhər saxladıblar. Ekskovatorçu bildirib ki, şirkət rəhbərliyi bu binanın sökülməli olduğunu deyib. Sakinlərin etirazından və qəzəbindən qorxan ekskovatorçu texnikanı alimlər binasının həyətində qoyaraq qaçır.
Hadisə baş verən zaman Ölkə.Az-ın reportyor qrupu həmin ərazidə olub.
Dünən gecə baş verən hadisə ilə bağlı hazırladığımız reportajı sizə təqdim edirik:
Bakı şəhər, Yasamal rayon, Şərifzadə 33 ünvanında yerləşən "alimlər binası" əvvəllər Milli Elmlər Akademiyasının tabeçiliyində olub. Sonradan bina Bakı Şəhər İcra Hakimiyyətinin tərkibində olan departamentlərdən birinə verilib. Binadakı 92 mənzilin hamısının alqı-satqı sənədi (kupça) var.
4 ay bundan əvvəl Yasamal Rayon İcra Hakimiyyətinin başçısı İbrahim Mehdiyev "Alimlər binası"nın sakinləri ilə görüşərək bildirib ki, bina prezidentin yararsız evlərin söküntüsü ilə bağlı sərəncamına əsasən söküləcək. Bina sakinlərinə isə 18 aylıq kirayə haqqı verərək binanın yerində hündürmərtəbəli yeni yaşayış binasının tikiləcəyini deyiblər. Yasamal Rayon İcra Hakimiyyətinin başçısı Mehdiyev İbrahim sakinlərlə görüş zamanı bildirib ki, bina qismən yaşayışa yararsızdır.
Yasamal Rayon İcra Hakimiyyətinin başçısı Mehdiyev İbrahim binanın sökülməsini Yasamal Rayon 22 saylı Mənzil İstismar Sahəsinin rəisi Məmməd Hüseynova tapşırıb. Maraqlısı ondadır ki, "alimlər binası" Yasamal Rayon 22 saylı Mənzil İstismar Sahəsinin ərazisinə aid deyil. Yasamal Rayon İcra Hakimiyyətinin başçısı Mehdiyev İbrahimdən sonra sakinlərlə görüşə Yasamal Rayon 22 saylı Mənzil İstismar Sahəsinin rəisi Məmməd Hüseynov gəlib. Sakinlərlə əvvəlcə mehriban danışan "JEK" müdiri sonradan bina sakinlərinə bildirib ki, nə edirsiniz edin, bina söküləcək. "Sovetskinin" sökülməsini də mən etmişəm, ona görə icra başçısı buranın sökülməsini də mənə tapşırıb.
"Alimlər binası"nın sökülməsi ilə bağlı maraqlı məqamlardan biri də odur ki, binanı sökən və tikən şirkətin adını heç kim bilmir.
Adı bilinməyən şirkətin ekskovatorları gecə saat 23:30-da "alimlər binası"nın həyətinə hücum edir. Bina sakinləri uşaqdan böyüyə hamısı küçədədir. Elə adamlar var ki, yataq paltarında həyətə düşüb. Həyətdəki gurultudan və binadakı titrəyişdən həyəcanlanaraq aşağı qaçıblar. Heç kim nə baş verdiyini bilmir. Bina sakinləri bir neçə dəfə ərazi üzrə sahə müvəkkilinə zəng edirlər, hər dəfə də eyni cavabı alırlar, "əməliyyatdayam, birazdan gəlirəm".
Bina sakinləri ilə söhbət edirik. Bina sakini Əzizağa Ələkbərov deyir ki, bizə edilən təkliflə razılaşmadıq. Görəndə ki, bunların planı alınmır, qazımızı, işığımızı kəsdilər. Bu gün isə suyu kəsməklə hədələyirdilər. Biz isə qazımızı da yandırdıq, işığımızı da. Ona görə də, hiddətlənib gəlib binanın hasarını uçurdublar. Əgər bunu edənlərin ləyaqəti, şərəfi olsa idi, gecə yox, gündüz vaxtı gələrdilər.
Söhbətdən sonra Əzizağa Ələkbərov yenidən əraziyə baxan sahə müvəkkilinə zəng edir. Sahə müvəkkili yenə eyni cavabı verir, "əməliyyatdayam, gələcəm". Bundan sonra Əzizağa Ələkbərov Daxili İşlər Nazirliyinin 102 xidmətinə zəng edib hadisə barədə məlumat verir.
Bina sakini, AMEA-nın Coğrafiya İnstitutunun elmi işçisi Səmədova Çərkəz bildirir ki, icra hakimiyyəti binanın söküləcəyini deyəndən sonra buraya bir şirkət gəldi.
"Hər gün başqa bir təkliflə qapımızı açdılar. Binada yaşayanların yarısından çoxu şirkətin təklifi ilə razılaşmadı. Burada yaşayanların hamısı ziyalı adamlardır, bu yaşda biz niyə küçələrə düşməliyik? 5 gün idi qazımızı kəsmişdilər. Hər cür təzyiq edirlər ki, çıxaq, ancaq bizi razı salan təklif olmasa, biz mənzillərimizdən çıxmayacağıq", - deyə Çərkəz xanım bildirir.
İcra başçısının bina sakinləri ilə görüşündən sonra Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi binanın yararlı olub-olmaması barədə binaya baxış keçirib. Əldə etdiyimiz sənəddə bildirilir ki, binaya vizual baxış keçirilib. Vizual baxış nəticəsində qurum binanın yararsız olduğunu elan edib. Maraqlısı ondadır ki, sənəddə rəsmi möhür yoxdur.
Həmin sənədlərin şəkillərini də sizə təqdim edirik:
Həmin gecə saat 00:30-da 2 ədəd post-patrul maşını binanın həyətinə gəlir. Polis mayoru sakinlərdən nəyin baş verdiyini soruşur. Sakinlər isə hadisəni polislərə danışırlar. Sakinlərin köməkliyi ilə ekskovatorun sürücüsü və şirkətin əməkdaşı olduğu deyilən iki nəfəri saxlayaraq bölməyə aparırlar.
Gecə saat 03:00-dur. "Alimlər binası"nın sakinləri hələ də küçədədir. Onlar evlərinə girdikdən sonra binanın söküləcəyindən, hasarın uçurulacağından qorxurlar.
Gecə saat 03:30-da əməkdaşlarımız ərazidən gedirlər. Səhər saatlarında isə, bina sakinləri əməkdaşımıza zəng edərək bildirirlər ki, adı bilinməyən şirkətin iki əməkdaşı biz az əvvəl gələrək onlara deyib ki, onsuzda "dabrosunu" almışıq, bina söküləcək. Mənzilləri boşaldın.
Mövzuya qayıdacağıq...
