\"Fəaliyyəti olmayan partiyanın mətbuat xidməti haradan olsun?\"

"Əgər bir partiyanın fəaliyyəti yoxdursa, o media üçün maraqlı deyil və orada mətbuat xidmətinə ehtiyac yoxdur".

Bu sözləri Ölkə.Az-a Azərbaycan Xalq Cəbhəsi Partiyasının mətbuat katibi Vüsal Qarayev deyib.

Vüsal Qarayev ölkədəki bir çox partiyaların mətbuat xidmətlərinin olmamasına münasibət bildirib:

"Partiyanın mətbuat xidməti o partiyanın fəaliyyətini media vasitəsi ilə ictimailəşdirən, bu barədə mətbuat nümayəndələrinə məlumat verən orqandır. Əgər partiyanın heç bir fəaliyyəti yoxdursa, demək ki, orada ictimailəşdiriləcək bir şey də yoxdur və demək ki o qurum mətbuat nümayəndələri üçün də maraqlı deyil. Belə olan halda təbii ki, orada mətbuat xidmətinə ehtiyac yoxdur. Mətbuat xidməti olmayan siyasi partiyalar birmənalı olaraq fəaliyyətsizdirlər.

Bu gün ölkədə nə qədər aktiv partiya var? Barmaqla sayılacaq qədər. Demək olar ki, partiyaların böyük əksəriyyəti yalnız kağız üzərində addan ibarətdir. O zaman nəyinə lazımdır bu partiyanın mətbuat xidməti? AXCP olaraq fəaliyyətə başladığımız gündən gərgin iş rejimindəyik, fəaliyyətdəyik. Partiyanın mətbuat katibi olaraq mütamadi olaraq media ilə çalışıram, fəaliyyətimiz barədə məlumatlar verirəm. Bunu medianı izləyən hər kəs görə bilər. Çünki qarşımıza hədəf qoymuşuq, məqsədlərimiz var və bu hədəfə, məqsədə çatmaq üçün işləyirik, çalışırıq, fəaliyyət göstəririk. Ölkədə nə qədər çox aktiv fəaliyyətdə olan partiya olarsa, rəqabət gücü artar. Rəqabət inkişaf deməkdir və bundan başqa həm də müxalifətin hakimiyyətə təsir gücü artmış olar".

Səxavət Məmməd
Ölkə.Az