Müasir Azərbaycanın 23 ili...
Bu gün ölkə tarixinin ən əhəmiyyətli günlərindən birini yaşayırıq. Müasir Azərbaycan dövləti nə az, nə çox, düz 23 illiyini qeyd edir. 23 il bundan əvvəl Azərbaycan Respublikasının Müstəqilliyi haqqında Konstitusiya aktı qəbul olunub.
Bu tarixi əhəmiyyət kəsb edən xüsusi gün münasibəti ilə Ölkə.az həmin dövr siyasi prosseslərdə yaxından iştirak etmiş siyasətçilərin fikrini öyrəndi:
Zərdüşt Əlizadə: "Azərbaycan xalqının əksəriyyəti dövlət quruluşuna uyğun olaraq yaşayırdı. Hakim zümrə, vəzifədə olan təsərrüfat partiyaları ona görə, bunu istəyirdilər ki, ölkənin sərvətlərini heç kəsdən qorxmadan talasınlar. Buna da nail oldular. Azərbaycanın müstəqilliyi Moskvada, paytaxda gedən siyasi oyunların nəticəsi oldu. Hakimiyyət uğrunda çarpışma gedirdi. SSR-nin dağılması ilə bərabər qısa bir müddətdə minlərlə milyorderlər yaranmağa başladı. Hansı ki, heç biri bazara yeni bir şey icad etməmişdi. Bu adamlar xalq mülkiyyətini oğurladılar və milyorladerlərə çevrildilər. İndi biz müstəqil sayılırıq, amma əvvəllər bir ağamız var idisə, indi beş ağamız var. Əvvəl ədalətsizlik baş verəndə bir yerlərə üz tuta bilirdiksə, indi heç yerə uz tuta bilmirik. Allahın ümidinə qalmışıq. Azərbaycan sivilizasiya baxımından 100 il geri düşdü. Sənayemiz itdi, təhsilimiz geri qaldı, elmimiz itdi. Sadəcə bir ovuc rüşvətxorun, satqının əlindəyik".
Fəzail Ağamalı: "Qısaca olaraq onu deyə bilərəm ki, 1991-ci ilin 18 oktyabrın ən əlamətlər günlərindən biri kimi tarixə düşdü. İllər öncə bu gün Azərbaycan parlamenti dövlət müstəqilliyi haqqında konstitusiya aktını qəbul etdi. Azərbaycan xalqı o dövrdə böyük, həmçinin ciddi fədəkarlıq nümayiş etdirdi. Ən ağır mübarizələrdən, hətta mən deyərdim ki, 20 yanvar kimi qanlı hadisələrdən mərdliklə keçərək müstəqilliyə qovuşdu. Mən deyərdim ki, müstəqilliyə qovuşmağın əsasını Azərbaycan xalqı ardıcıl igidlik nümayiş etdirməklə əldə etdi.
Heydər Əliyev müstəqilliyə atılan addımlarla öz şəxsi nümunəsi ilə bir örnək rolunu oynamaqda idi. Hər şeydən əvvəl bütün bunlar Azərbaycan xalqının ciddi əzmkar, iradəli xalq olduğunu bir daha təstiq etdi. Ayaz Mütəllibov rejimi Azərbaycan xalqının iradəsindən geri çəkinərək 1991-ci ilin oktyabrın 18-ində dövlət müstəqilliyinə göstərdiyi müqaviməti dayandırmalı oldu və çox ciddi əhəmiyyət kəsb edən sənəd qəbul edildi. Bundan sonra Azərbaycanın artıq dövlət müstəqiliyi ayrı-ayrı müstəmləkələrdə Türkiyə, Ruminiya, Pakistan, İsveçrə, ABŞ, İran, Rusiya və digər ölkələr tanımağa başladı.
1992-ci ilin martın ayının 2-indən dövlət müstəqilliyi de-fakto olaraq tanındı. Uzun illərdən bəri, Azərbaycan öz müstəqilliyinə qovuşdu və biz bu gün bu tarixi bayramı qeyd edirik.
Bu dövrü sovet ilə müqayisə edənlər, onu bundan üstün tutan insanlara gəlincə, onlar müstəqillik düşüncələrindən uzaq olan insanlardılar".
Pənah Hüseynli ilə isə əlaqə saxlayarkən o, Azərbaycan Respublikasının ikinci prezidenti Əbülfəz Elçibəyin məzarını ziyarət edirdi.
Pənah Hüseyn: "İlk olaraq xalqımızı müstəqillik günü münasibətilə müstəqillik uğrunda çalışmış, vuruşmuş insanları təbrik edirik. Mənə elə gəlir ki, bu Azərbaycan tarixinin, bizim dövrümüzün ən şərəfli tarixlərindən, illərindən biridir".
Pənah Hüseynin Zərdüşt Əlizadənin çıxışına münasibəti isə bu cür oldu: "Azərbaycan xalqına mənsub insanlardan heç kəs elə şey deməz".
Fatimə İbrahimova
Ölkə.az
