Gəncə Lokomotiv Deposunda maşinistlər bir faranın güdazına getdiklərindən şikayətlənirlər

Gəncə Lokomotiv Deposunun rəisi İslam Əsgərovun aşağı vəzifəyə keçirdiyi işçiləri Əliyev Rahim və Həsənov Nazim bu addımın qanunsuz olduğunu bildirərək depo rəisindən Gəncə Şəhər prokrorluğuna şikayət ediblər, hüquqlarının bərpası üçün ölkə başçısına və müvafiq orqanlara müraciət ünvanlayıblar.

Əliyev Rahim Ölkə.Az-ın redaksiyasına müraciət edərək bildirib ki, 2006-cı ildən Gəncə Lokomotiv Deposunda maşinist işləyir. Onun iş yoldaşı Həsənov Nazim isə maşinist köməkçisidir.

Əliyev Rahim və Həsənov Nazimin sözlərinə görə, 06.08.2016 tarixində 1152 nömrəli manevr teplovozunu Yevlax Dəmir Yol stansiyasında işlədərkən PMS-in söküntü relsləri olan yüklü vaqona qoşularkən rels sürüşərək teplovozun farasını qırıb:

"Bundan dərhal sonra maşinist təlimatçısı işləyən Məsimov Məqsədə bu hadisə barədə məlumat vedik və oun göstərişi əsasında PMS-in işçiləri ilə birlikdə aktlaşdırdıq. Teplavoz təmirə gedəndən sonra 17.08.2016-cı il tarixində təmir üzrə rəis müavini Qasımov Sabit zəng vuraraq bildirdi ki, mən və köməkçim hər biri 25 manat olan 5 ədəd list dəmir almalısınız. Biz isə bildirdik ki, bizim o dəmirləri almağa pulumuz çatmr. Sabit Qasımov isə bildirdi ki, bunu rəisin özünə deyərsiniz. Əgər almasanız rəis sizi ya işdən azad edəcək, ya da aşağı vəzifəyə, yəni, çilingər vəzifəsinə keçirəcək. Biz bildirdik ki, bizim 125 manatımız (red. 5 list dəmir, hər biri 25 manat) yoxdur. Bu söhbətdən sonra Gəncə Lokomotiv Deposunun rəisi İslam Əsgərov bizi müzakirəyə çağırdı, fikirimizi öyrənmədən hər ikimizi çilingər vəzifəsinə keçirdi. Bizim günahımız olmadığı halda aşağı vəzifəyə keçirdiyi üçün Gəncə Lokomotiv Deposunun rəisi İslam Əsgərovu şikayət etmək məcburiyyətində qaldıq. Tək istəyimiz əvvəlki işimizə bərpa olunmağımızdır", deyə Əliyev Rahim Ölkə.Az-a ünvanladığı müraciətdə bildirir.

Redaksiya: Materialda adları çəkilən bütün şəxslərin və qurumların mövqeyini dərc etməyə hazırıq.

Səxavət Məmməd
Ölkə.Az