Müəllim olmaq istəyənlər etiraz etdilər
Müəllim olmaq üçün imtahan mərhələsindən uğurla keçib, müsahibə mərhələsindən kəsilən bir qrup şəxs Təhsil Nazirliyinə gələrək narazılıqlarını bildiriblər. Onlar müsahibə mərhələsində haqsız olaraq kəsildiklərini deyirlər. Nazirlik iradlara rəsmi münasibət bildirib.
Müəllim olmaq üçün test imtahanından uğurla keçən, buna baxmayaraq müsahibə mərhələsində kəsilən bir qrup şəxs Təhsil Nazirliyinin qabağına toplaşıb. Onlar test imtahanından yüksək bal toplamalarına baxmayaraq, müsahibə mərhələləsindən ciddi əsas olmadan kəsildiklərini iddia edirlər.
Şikayət edənlər isə İsmayılova Mənsurə, Əsgərova Asya, Seyidgülər Babayeva, Yusubova Əminə, Əhmədli Sima, Mahmudova Səadət, Ülkər Qəhrəmanlı, Əliyeva Aytən, Musayeva Səbinə, Sultanova Ülviyyə, Vəliyeva Arzu və başqalarıdır. Onların şikayətləri əsasən müsahibədə onların ciddiyə alınmaması, haqsızlıqlara məruz qalmaları, yüksək bal toplamalarına rəğmən qəbul olmamaları, seçim edən şəxslərin qərəzli mövqe sərgiləməsi və s göstərilib. Onlar yığdıqları ballara və özlərinə güvəndiklərini bildiriblər. Yenidən seçim turu təşkili tələb edirlər. Müəllim olmaq istəyən, amma iş tapa bilməyən vətəndaşlar nazirlikdən hüquqularının bərpa olunmasını tələb ediblər. Onların sözlərinə görə, imtahandan yüksək bal toplayıblar, amma müsabiqədə onlara müxtəlif növ maneələr yaradılıb.
Təhsil Nazirliyindən isə bildirilib ki, vakant yeri az, müraciət edənlər isə çox olduğundan onlar xüsusi seçim əsasında işə qəbul həyata keçiriblər. Müsahibə mərhələsi aparıcı məktəblərin direktorları, ilin müəllimi adına layiq görülmüş şəxslər və universitet psixoloqları tərəfindən həyata keçirilib.
Təhsil Nazirliyinin İnsan Resursları şöbəsinin müdir müavini Eşqi Bağırovun sözlərinə görə, nəticədən narazı olan şəxslər işə yenidən baxılması üçün ərizə ilə müraciət etməlidirlər. Belə şəxslər ikinci yerləşdirmədə də iştirak edə bilərlər.
