“Elnur Aslanovla Fərhad Məmmədov hər həftə Fətullah Gülənin planlarını müzakirə edirlər”

“Fətullah Gülənin Azərbaycandakı əsas adamları olan Prezident Administrasiyasının (PA) sabiq şöbə müdiri Elnur Aslanov və Strateji Araşdırmalar Mərkəzinin (SAM) direktoru Fərhad Məmmədov hər həftə görüşüb Fətullah Gülənin planlarını müzakirə edirlər. Bu dəqiq məlumatdır və mənim bundan şəxsən xəbərim var”.

Ölkə.Az-ın məlumatına görə, bunu bu gün Azərbaycan Mətbuat Şurasında keçirilən “Dini radikalizmə qarşı medianın rolu: Media və radikal dini cərəyanlar” mövzusunda “dəyirmi masa”-da çıxışı zamanı araşdırmaçı jurnalist, “Terrorun Gülən üzü” adlı kitabın müəllifi Aqil Ələsgər bildirib.

A.Ələsgər deyib ki, Fətullah Gülənin Azərbaycandakı adamları “Hizmət hərəkatı” adı ilə gizlənərək, radikal fəaliyyətlərini davam etdirir:

“Çox təəssüf ki, Fətullah Gülənə bağlı olan şəbəkə Azərbaycanda başqa adlar altında gizlənərək, fəaliyyətlərini davam etdirir. Misal üçün, “Çağ Öyrətim” məktəbləri indi “İstək” liseyi adı ilə qalır. Qafqaz Universiteti, “Zaman-Azərbaycan” qəzetindəki adamlar indi də sərbəst dolaşırlar. Dövlət qurumlarına kadrları yerləşdirən əsas adamlardan biri SAM-ın direktoru Fərhad Məmmədovdur. Bu adam hələ də dövlətin strateji qurumu olan SAM-a rəhbərlik edir”.

Zaur Əziz
Ölkə.Az