Dini Komitə rəsmisindən nurçuluqla bağlı
“Dini Qurumlarla İş üzrə Dövlət Komitəsi 2009-cu ildən etibarən nurçuluğu təbliğ edən kitablarının ölkəyə kütləvi şəkildə idxalına məhdudiyyət qoyub”.
Ölkə.Az-ın məlumatına görə, bunu jurnalistlərə açıqlamasında Dini Qurumlarla İş üzrə Dövlət Komitəsinin sədr müavini Gündüz İsmayılov bildirib.
Onun sözlərinə görə, sözügedən məsələni təsdiqləyən müvafiq müraciətlər və məktublar mövcuddur:
“Bu məsələlərlə bağlı mübarizənin 6-7 il bundan öncə başladığını nəzərə alsaq, 2009-cu ilin kifayət qədər uzaq bir zaman olduğunu görə bilərsiniz. Bununla bağlı müraciətlər, məktublar, eyni zamanda həmin məktublara Dini Komitənin cavabları var. Eyn zamanda həmin müraciətlərə mənfi cavab verdiyimiz üçün Dövlət Komitəsindən edilən şikayətlər mövcuddur. Bütün bunların hamısı açıq olan məsələlərdir”.
G.İsmayılov qeyd edib ki, 2009-cu ildən bəri bu məsələlərlə bağlı Dövlət Komitəsinə yüzlərlə şikayət daxil olub:
“İndiyədək Dini Qurumlarla İş üzrə Dövlət Komitəsində icmalarının üzvü hansısa dini cərəyana mənsub olan, o cümlədən nurçuluğa mənsub olan şəxslərdən ibarət dini icma qeydiyyamtdan keçməyib. Dövlət Komitəsi hər hansı dini cərəyanı, yaxud konvessiyanı qeydiyyata almır, dini icmaları qeydiyyata alır. Biz artıq 2009-cu ildən nurçuluğa mənsub dini ədəbiyyatların ölkəyə kütləvi şəkildə ixracına, idxalına, çapına məhdudiyyət qoymuşuq”.
Zaur Əziz
