Bakıda 48 minə yaxın uşaq I sinfə gedəcək
2016-2017-ci dərs ilində Bakı şəhəri üzrə I sinfə 48 minə yaxın uşağın qəbul olunacağı gözlənilir.
Ən son məlumata əsasən, mektebeqebul.edu.az saytı vasitəsilə 45742 nəfər valideyn məktəb, lisey və gimnaziyalara sorğu yerləşdirib.
Bakı Şəhər Təhsil İdarəsindən Ölkə.Az-a verilən məlumata görə, onlardan 42892 nəfəri övladlarının təhsil alması üçün ümumtəhsil məktəblərini, 2850 nəfəri isə lisey və gimnaziyaları seçib.
Qeyd edək ki, məktəblərdə I sinfə qəbul prosesi sentyabr ayının 15-i yekunlaşacaq.
Uşaqlarının I sinfə qəbulu üçün qeydiyyatdan keçməkdə gecikmiş valideynlər isə oktyabr ayının 15-dək Bakı Şəhəri üzrə Təhsil İdarəsinə ərizə ilə müraciət edə biləcəklər.
Xatırladaq ki, təhsil nazirinin müvafiq əmrinə əsasən, 2016-2017-ci dərs ili üçün I sinfə şagird qəbulunun elektron sistem vasitəsi ilə həyata keçirilməsi prosesinə 1 mart 2016-cı il tarixdən başlanılıb.
