Yazıçılar və millət vəkilləri Ramiz Mehdiyevin yeni kitabından danışdı
Yazıçılar və millət vəkilləri Ramiz Mehdiyevin yeni kitabı haqqında danışdılar
Ziyalılar fəlsəfə elmləri doktoru, akademik Ramiz Mehdiyevin İsmayıl Səfəvi: hökmdar və döyüşçünün portreti” kitabının birinci hissəsi haqqında fikirlərini Ölkə.az-la bölüşdülər.
Zahid Oruc: "Ramiz Mehdiyevin növbəti kitabı təkcə akademik dairələr və elmi ictimaiyyət üçün deyil, bütünlüklə Azərbaycan dövləti üçün yazılıb. Kitab ölkə rəhbərliyinin, hazırda respublikamızı yönləndirən siyasi elitanın bütövükdə mövqeyi hesab oluna bilər, çünki özlüyündə belə məsələlərə baş vurmaq həqiqi tarixi bizə, həmçinin dünyaya göstərmək təkcə hansısa akademikin işini özündə ifadə etmir, daha yüksək dərəcədə siyasi mahiyyət daşıyır, millətimizin mənafeyi üçün gərəklilik və önəmlilik kəsb edir. Bu həddindən artıq əhəmiyyətli məsələdir. Etiraf etmək lazımdır ki, Azərbaycan cəmiyyətində, hətta geniş siyasi dairələrdə hələ də müxtəlif tarixi məsələlərə baxışlar bir-birindən kəskin şəkildə fərqlənir və bu bizim işimizə ziyan vurur.
Tarix bütün konfiliktlərin həllində önəmli məsələdir. Bilirsiniz ki, bu gün dünyada dövlətlər öz eski əraziləri üzərində bərqərar deyillər. Amma biz onu da yaxşı bilirik ki, cəmiyyətlər məhz tarixi həqiqətləri ilə öz mövqelərində, apardıqları ideaya savaşında ciddi bir tutarqa əldə edirlər. Mən çox arzulayıram ki, bu kitab müxtəlif dillərə tərcümə olunmaqla bərabər,hər bir azərbaycanlının evində olsun. Düşünürəm ki, Ramiz Mehdiyev bir dövlət adamı kimi kifayət qədər böyük təcürübəyə sahib bir şəxs olaraq attığı addımlar, verdiyi mesajlar, qələm məhsulları Azərbaycan milli maraqlarına nə qədər uyğun olmağı ilə yanaşı cəmiyyəti hərəkətləndirir, onu tərpədir. Yaxşı mənada ideyalara bağlayır. Odur ki, düşünürəm ki, bunu Azərbaycan dövlətinin kitabı kimi qəbul edib, ondan faydalanmalıyıq".
Rəşad Məcid: "Düzü hələ o kitabı oxumasam da, Şah İsmayıl Xətai ilə bağlı onun yazdığı məqalələrin oxumuşdum. Bir sıra polemik məsələlərə münasibət bildirmişdirdi. Demək olar ki, bir çox məsələlərdə bu fikirləri bəyənişdim. Azərbaycan dövlətçiliyi, ümumi dövlətçilik baxımından düzgün fikirlərdir. Ümumiyyətlə tarixi şəxslərlə əlaqədar hər zaman ziddiyyətli fikirlər olur. Mən özüm də müxtəlif yaşlarımda Şah İsmayıl Xətainin fəaliyyətinə baxışlarımda ziddiyyətli məqamlarım olub. Ramiz Mehdiyevin baxışı isə çox soyuqqanlı, dövlətçilik mənafeyindən yürüdülən fikirlərdir. Düşünürəm ki, müstəqil Azərbaycan dövləti üçün bu fikirlərdən bəhrələnmək çox yararlıdır. Əlbəttə ki, bunun ətrafında fikirlərlə barışmayanlar, razılaşmayanlar ola bilər, amma bu dövlətçilik baxımından olduqca vacib fikirlərdir. Buna görə də, bu tip kitabların təbliğatına ehtiyyac var".
Fərəc Quliyev: "Mən onun bir çox kitablarını çox ciddi qiymətləndirirəm, son vaxtlar da Dağlıq Qarabağla bağlı çox ciddi fundamental araşdırma etmişdi. Şah İsmayıl Xətaiyə aid bu kitabın çıxması tam o ana təsadüf etdi ki, onun haqqında yanlış təsəvvürlər formalaşmaq üzrə idi. Nəinki Azərbaycanda, təəssüflər olsun ki, eyni hal Türkiyədə də baş vermişdi. O, bizim keçmişimizi öyrənməyimiz baxımından və gələcəyə bir örnək vermək baxımıdan çox əhəmiyyətlidir. Mən çox təəssüf edirəm ki, bizdə bu tipli əsərlər çox azdı".
Siyavuş Novruzov: "Bu kitab Azərbaycan üçün tarixi əhəmiyyət daşıyır. Kitab yaş həddi olmadan hər kəsin oxuyub, maariflənəcəyi özündə tarix yükü daşıyan kitabdır. İnanıram ki, bu kitabdan hər kəs faydalanacaq".
Nəriman Həsənzadə: "Ramiz Mehdiyev Azərbaycanın görkəmli filosofudur. Onun son vaxtlar ard-arda fəlsəfəyə aid çıxan kitabları və Şah İsmayıl Xətaiyə aid tarixi mənbələrdən məlumatları axtarıb üzə çıxartmasına yüksək qiymət verməmək mümkün deyil. Bu böyük hadisədir. Biz tariximizi öyrənməliyik. Dünəni bilmədən sabah hara gedəcəyimizi bilə bilmərik. Buna görə də, belə bir şəxsiyyətin həyatını elmə həsr etməsi və Şah dövrünü tətqiq etməsi çox yüksək bir hadisədir. Mən onu yüksək qiymətləndirirəm. Belə bir vaxtda bu cür kitabın çıxması olduqca qiymətli hadisədir. Ramiz bəyə böyük yaradıcılıq yolunda uğurlar arzu edirəm".
Xatırladaq ki, Bakı Slavyan Universitetində Prezident Administrasiyasının rəhbəri, akademik Ramiz Mehdiyevin rus dilində işıq üzü görmüş “Şah İsmayıl Səfəvi: hökmdar və döyüşçünün portreti” kitabının birinci hissəsinin təqdimat mərasimi keçirilib.
Ölkə.Az
