Dünya Azərbaycanlı Gənclər Konseyi yaradılır
Türkiyədəki azərbaycanlı tələbə təşkilatı müraciət yaydı
Salam, hər vaxtınız xeyir, əziz həmvətənlilərimiz!
Bildiyiniz kimi dünyanın dörd bir tərəfində həmyerlilərimiz yaşayır. Bəziləri təhsil üçün, bəziləri iş üçün, bəziləri isə oranın vətəndaşlığını qəbul edərək o ölkələrdə yaşayırlar.
Hər il istər anım günləri, istərsə də bayram günləri ölkəmizlə birlikdə digər dövlətlərdə yaşayan həryerlilərimizin təşəbbüsü ilə xarici dövlətlərdə qeyd olunur. Bunlar bəzən Diasporamızın fəaliyyəti ilə, bəzən də həmin ölkələrdə yaşayan fəal həmvətənlilərimizin şəxsi təşəbbüsü ilə gerçəkləşir.
Lakin bu işi daha kordinasyalı şəkildə həyata keçirmək üçün xaricdə yaşayan fəal gənclərlə əlaqələr qurmağa başlamışam. Məqsədim dövləti, milləti üçün çalışan gənclərin bir-biri ilə əlaqəli olaraq, məsləhətləşərək bu işləri icra etməsidir. Misal üçün, 26 fevral günü Xocalı faciəsini anmaq üçün dünyanın hər yerində eyni anda yürüyüşlər başlasın, eyni mətn oxunsun, birlik və bərabərliyimiz ortaya çıxsın.
Mənim fikrimcə, Türkiyənin 81 şəhərində 81 təmsilçimiz olsa, eynilə digər dövlətlərdə, diaspora fəaliyyətimizə müsbət təsir göstərər. Vətəndaşlarıməz istənilən bir şəhərə getdiyi zaman onları orada qarşılayacaq birilərinin olması həqiqətən də gözəl təşəbbüs olar. Seçdiyimiz təmsilçilərimiz hər biri oxuduğu universitetdə universitet daxilində fəaliyyət göstərən tələbə təşkilatları kimi bir təşkilat yaradacaqlar. Beləliklə, həyata keçirilən tədbirlər zamanı xərclənən vəsait tələbələr tərəfindən deyil universitet tərəfindən qarşılanacaq.
Şəhər təmsilçilərimizin siyasi görüşü elə də böyük rol oynamır. Çünki mənim düşüncəm hansısa siyasi partiya və ya hansısa bir şəxsə xidmət etmək deyil, Azərbaycan Cumhuriyyəti Dövlətinə və Azərbaycan xalqına xidmət etməkdir.
Ümidvaram ki, bu çətin yolda bizlərin yanında olacaqsınız.
Hörmətlə, Mərdan Orucoğlu
DÜAP Qaradəniz Bölgə Konsey Başqanı və Giresun Üniversiteti Beynəlxalq Tələbə Nümayəndəliyi Rəhbəri.
