Razi Nurullayev: "Bu cür həbslər gözə kül üfürməkdir, сinayətkarlar və oğrular isə azadlıqdadır"
Bakı Ağır Cinayətlər Məhkəməsində Səbail rayonu, Bibiheybət qəsəbəsində yerləşən “Dostluq” parkının ərazisindəki torpaq sahələrinin alqı-satqısını qanunsuz olaraq həyata keçirməkdə təqsirləndirilən şəxslərin cinayət işi üzrə bir neçə gün öncə keçirilən məhkəmə prosesi diqqətdən kənarda qaldı.
"Dostluq" parkında qanunsuz tikilən villaların sökülməsi ilə bağlı prezident İlham Əliyev ötən il keçirdiyi müşavirədə Bakı Şəhər İcra Hakimiyyətinin başçısı Hacıbala Abutalıbova tapşırıq vermiş və bundan sonra söküntü işləri başlamışdı.
Azərbaycan Xalq Cəbhəsi Partiyasının (AXCP) sədri Razi Nurullayev Ölkə.Az-da məsələyə münasibət bildirib. Sədr, "Dostluq" parkının ərazisindəki torpaq sahələrinin alqı-satqısını qanunsuz olaraq həyata keçirməkdə təqsirləndirilən Tərlan Hüseynovun həbs edilməsinin, sadəcə gözə kül üfürmək olduğunu deyib:
“7 saylı Mənzil Kommunal İstismar Sahəsinin (MKİS) rəisi Quliyev Famil və Bibiheybət Bələdiyyəsinin baş memarı Etibar Məmmədov da həbsdədir.
Məsələnin maraqlı tərəfi həbs edilənlərdir. Bir makler kimdir ki, milyonlarla qiyməti olan torpaq sahələrini satsın və bundan yuxarıların xəbəri olmasın? JEK müdirinin ixtiyarı nədir ki, torpaq satsın, villa tikdirsin? Bələdiyyənin baş memarı olmursan, lap sədri ol, nə bilim prezidenti ol, lap istəyirsən Bakının baş memarı ol, daşı daş üstə belə qoya bilməzsən. Lazımi yerlərin xəbəri olmadan və haqqı çatmadan. İcra hakimiyyəti, Bakı şəhər icra hakimiyyəti, digər əlaqədar qurumlar qalıb, bir iki yetim-yesiri tutub içəri atırlar. Bəs milyonları alıb sənəd düzəldənlər, rüşvət alanlar, sənəd verənlər, göz yumanlar hara getdi? Onlar niyə həbsə girmir?
Bu cür həbslər gözə kül üfürməkdir. Əsil cnayətkarlar və oğrular isə azadlıqda meydan sulayır. Qanunsuz yollarla yığdığını da dədə malı kimi xərcləyir və kasıb millətdən xəbəri də yoxdur. Budur ədalət?”
