Şərif Ağayar: "Buna kobudluq demək olmaz, bu hörmətsizlikdir"
Bu gün ANS telekanalının efirində yayımlanan "Günəbaxan" verilişi zamanı yazıçılarla aparıcı arasında heç də xoş olmayan hadisə yaşanıb. Belə ki, verilişə qonaq qismində çağırılan yazıçı Şərif Ağayar, Mirmehdi Ağaoğlu və Ağa Cəfərli efir zamanı kobud aparıcı Kamran Həsənli tərəfindən kobud rəftara məruz qalıblar.
Yazıçıların əlindən mikrafonu almaq, onlara "siz bir-birinizin əlindən mikrafon qapırsınız, mən özüm sizə mikrafon verəcəm" deyərək kobudluq etməsi tamaşaçıların olduqca qəzəbinə səbəb olub.
Məsələ ilə əlaqədar verilişə qonaq qismində dəvət almış yazıçıların fikirlərini öyrəndik.
Ölkə.az-ın ilk sualını yazıçı Şərif Ağayara ünvanladıq.
- Kamran bəy "efiri tərk edə bilərsiniz" dedikdə getməmənizə nə səbəb oldu?
Şərif Ağayar: "Elə olmadı. Mən özüm dedim istəsəniz gedərəm. O ağzını sürüdü. Dəqiq heç nə demədi. Bizdən mikrafonu alanda da dedim "qaytarmasan verilişi tərk edecəm". O da qaytardı. Buna kobudluq demek olmaz, hörmətsizlik etdi. Mən də cavabını verdim ki, veriliş özü bir toyxana olduğu üçün polemikamız alınmayacaq. Mən verilişi buna görə tərk etmədim ki, ANS-ə və orda işləyən dostlarıma hörmətsizlik olmasın. Kamranla bağlı problemim yoxdur".
-Kamran Həsənli sizi tanımadıqda, yəni adınızı bilmədikdə təəccübləndinizmi?
Şərif Ağayar: "Yox, sadəcə ona təəccübləndim ki, adam verilişinə çağırdığı adamı, ən azı vikipediyadan araşdırar, heç olmasa verlişin redaktorundan, prodüsserindən, köməkçisindən soruşar. (gülür )Kamran məni çox yaxşı tanıyır, sadəcə orada işinə gəlmirdi bu tanışlıq".
-Sizinlə birlikdə efirə qonaq olan yazıçı Ağa Cəfərli bu hadisəni kiçik hadisə hesab edir bəs siz?
Şərif Ağayar: "Mən isə bunu ümumiyyətlə heç hadisə hesab etmirəm".
Mirmehdi Ağaoğlu: "Biz də jurnalist fəaliyyəti ilə məşğuluq. Müsahibəyə getdiyimiz adam haqqında məlumat əldə edirik, yazıçıdırsa əvvəlcədən bir neçə əsərini oxuyuruq, əvvəlki müsahibələrinə göz atırıq. Kamran Həsənli isə verilişdə özünü elə göstərdi ki, guya bizi tanımır. Tanımırdısa verilişdən əvvəl gözləmə otağında 20 dəqiqə bir yerdə olmuşduq. Bilmirdisə onda soruşub öyrənərdi. O, bütün bunları etməyib verilişdə tanımadğını göstərməklə guya bizi kiçiltmək istəyirdi. Doğrusu, Kamran Həsənliyə yaraşdırmadım".
- Ümumilikdə efir zamanı ayrıseçicilik etmək, müğənnilərin çıxışına daha çox yer vermek düzgün idimi?
Mirmehdi Ağaoğlu: "Repertuarını toylara hesablayan müğənniləri yazarlardan üstün tutan aparıcıdan yəqin ki, bundan artığını gözləmək sadəlövhlük olardı".
Ağa Cəfərli isə baş verənləri ciddi hesab etmədiyinə görə bu barədə açıqlama vermək istəmədiyini bildirdi.
Ağa Cəfərli: "Vallah elə bir ciddi şey olmayıb ki, bununla bağlı da açıqlama verək"
Xatırladaq ki, efirə qonaq qismində dəvət alan yazarlar toylarda baş verən israfçılığın qarşısını almaq üçün facebook sosial şəbəkəsində "toylara yox de" həştaqı yaratmışdılar. Kompaniya kiçik bir zamanda sosial şəbəkə istifadəçiləri tərəfindən olduqca maraqla qarşılanmışdır.
Fatimə İbrahimova
Ölkə.az
