Tağı Əhmədov referendumdan danışdı
Bu gün Yeni Azərbaycan Partiyasının (YAP) Yasamal rayon təşkilatında sentyabrın 26-da keçiriləcək ümumxalq səsverməsinə (referenduma) hazırlıq tədbirləri çərçivəsində YAP Qadınlar Şurasının növbəti görüşü keçirilib.
“Ölkə.az” saytı xəbər verir ki, görüşdə partiyanın Yasamal, Nəsimi, Suraxanı, Binəqədi, Abşeron, Qaradağ və Xəzər rayonlarının fəalları iştirak ediblər.
Görüşü giriş sözü ilə açan YAP Yasamal rayon təşkilatının sədri, “Yeni Azərbaycan” referendum üzrə təşviqat qrupunun səlahiyyətli nümayəndəsi Tağı Əhmədov Ali Qanunumuzda edilən dəyişiklik və əlavələrin mahiyyəti, dövlətçilik sisteminin təkmilləşdirilməsindəki səmərəsi barədə məlumat verib.
T.Əhmədov deyib ki, ümumxalq səsverməsinə hazırlığın ən mühüm mərhələsi olan təbliğat kampaniyasına “həmrəy olaq, “hə” deyək” çağırışı ilə başlayan və mütəşəkkilliklə davam etdirən “Yeni Azərbaycan” referendum üzrə təşviqat qrupunun seçicilərlə görüşləri biri-birindən maraqlı keçirilir.
Milli Məclisin deputatı, YAP-ın beynəlxalq əlaqələr şöbəsinin müdiri, partiyanın Qadınlar Şurası sədrinin müavini, “Yeni Azərbaycan” referendum üzrə təşviqat qrupunun səlahiyyətli nümayəndəsi Sevinc Fətəliyeva müstəqilliyimizin ilk günlərindən qüdrətli Azərbaycan naminə fəadkarlıq göstərən Azərbaycan qadınlarının siyasi hazırlıq və ölkə iqtisadiyyatının inkişafındakı rolundan danışıb.
O bildirib ki, cəmiyyətin aparıcı qüvvəsi olan qadınlar referendumda da fəallıq göstərəcək, ümumxalq səsverməsində öz sözlərini deyəcəklər.
Milli Məclisin deputatı, YAP Siyasi Şurasının üzvü, partiyanın Nəsimi rayon təşkilatının sədri Məlahət İbrahimqızı isə əhalini hamılıqla referendumda “hə” deməyə çağırıb:
“Əminəm ki, Azərbaycan xalqı cənab Prezident İlham Əliyevin ölkədə gördüyü uğurlu işlərə qiymət verərək, hamılıqla referndumda iştirak edəcək və çıxarılan məsələlərə müsbət mövqe sərgiləyəcək”.
Azərbaycanın Səhiyyə Nazirliyi Gözəllik Mərkəzinin direktoru, YAP Qadınlar Şurası İdarə Heyətinin üzvü Zərifə Quliyeva çıxış edərək təbliğat kampaniyası çərçivəsində keçirilən seçicilərlə görüşdə hiss olunan yüksək əhval-ruhiyyəni dövlətin daxili və xarici siyasətinin dəstəklənməsinin ifadəsi olaraq qiymətləndirib.
YAP-ın Yasamal, Abşeron, Binəqədi rayon təşkilatları Qadınlar Şuralarının sədrləri - Tamella Şahbazova, Təyyibə Hüseynova, Aytac Əliyeva çıxış edərək, bütün siyasi kampaniyalarda fəallıq göstərən qadınların 26 sentyabrda da mütəşəkkil siyasi qüvvə kimi birlik və həmrəylik göstərəcəklərini vurğulayıblar.
Seçicilər “Yeni Azərbaycan” referendum üzrə təşviqat qrupunun “həmrəy olaq, “hə” deyək” çağırışına qoşularaq səsvermədə elliklə iştirak edəcəklərini bəyan ediblər.
Zaur Əziz
