Kürdəmirdə məktəb direktoru quyunu sökdürüb evinə apardı

Kürdəmir rayonu Böyük Kəngərli kənd orta məktəbinin bir qrup müəllimi Ölkə.Az-ın redaksiyasına müraciət edərək direktor Qənimət Tağıyevdən narazı olduqlarını bildiriblər.

Müəllimlərin sözlərinə görə, İnşaat Mühəndisləri İnstitutunu (indiki Memarlıq və İnşaat Universiteti-red.) bitirən direktor özünə riyaziyyat və informatika fənlərindən 18 saat dərs yazır:

"Halbuki hətta ixtisas uyğun gəlsə belə, direktor 12 saatdan artıq dərs keçə bilməz. Amma bu adamın ixtisası da düz gəlmir. Ümumiyyətlə, məktəbdə bir neçə fənnin müəllimləri çatışmır. Həmin fənləri qeyri-fənn müəllimləri keçirlər".
Müəllimlər bildirirlər ki, direktor məktəbin həyətindəki quyunu da sökdürüb:

"Həmin quyunu sökdürüb, avadanlıqlarıyla birgə aparıb öz həyətində quraşdırıb. Bu adam heç kimdən qorxmur. Hətta müəllimlərə deyir ki, əlavə saat almaq istəyirsinizsə, hörmət etməlisiniz".

Əməkdaşımız məsələ ilə bağlı direktorla bir neçə dəfə əlaqə saxlamaq istəsə də, bu, mümkün olmayıb.

Mövzunu davam etdirəcəyik.

İntiqam VALEHOĞLU
Ölkə.Az