Direktor: "Qaçırılan qız məktəbə gəlmək istəsə də, icazə verilməyəcək"

"O qız bir oğlana adaxlıydı, başqasına qoşulub qaçdı. Özləri də cənub bölgəsindəndirlər".

Bu sözləri Ölkə.Az-a Sumqayıt şəhərindəki 9 saylı orta məktəbin direktoru Bəhruz Səlimxanov bir neçə gün öncə qaçırılan şagird barədə danışarkən səsləndirib. Səlimxanov bildirib ki, həmin gün şagirdin anası məktəbə gəlib və halı pisləşib:

"Biz əvvəlcə bilmirdik ki, o qəsdən belə edir, yoxsa, doğrudan da uşağına görə narahatdır. Sonradan məlum oldu ki, onun qızının qaçırılmasından xəbəri varmış. O şagird dərsə gələ bilməz, gəlmək istəsə də, buraxılmayacaq. Ümumiyyətlə, Azərbaycanda belə hallar çoxdur. İstəməzdim ki, bu kimi xəbərlər mətbuatda dərc edilsin".

Qeyd edək ki, şagird qaçırıldığı gün Bəhruz Səlimxanovun Sumqayıt Şəhər Polis İdarəsinə aparılmasıyla bağlı məlumat yayılmışdı. Direktor isə mətbuata açıqlamasında bu məlumatı təkzib eləmişdi.

İntiqam VALEHOĞLU
Ölkə.Az