"Zərbə" pilotsuz aparatları ordumuza daha təkmil kəşfiyyat-zərbə funksiyası verir"

Azərbaycan yeni nəsil "Zərbə" pilotsuz aparatının istehsalına başlayıb.

Əldə olunan məlumata görə, Müdafiə Nazirliyi yüzlərlə "Zərbə" pilotsuz aparatı üçün Müdafiə Sənayesi Nazirliyinə sifariş verib.

"Zərbə" pilotsuz aparatları və bu tip pilotsuz aparatlarla ordumuzun təmin edilməsi barədə hərbi ekspert, ehtiyatda olan polkovnik-leytenant Abuzər Əbilov fikirlərini Ölkə.Az-la bölüşüb:

"Zərbə" pilotsuz aparatları yeni nəsil pilotsuz aparatlar hesab olunur. Bu artıq həm uzaq məsafənin vurulması zamanı insan itkisinin qarşısını alır, həm də bu zaman zərbə endirmək funksiyasını saxlayır.

Pilotsuz aparatlar müasir döyüşün vacib atributlarından biridir. Onlar həm vizual kəşfiyyat, həm artilleriyanın korekti, həm də atəşin idarə olunması üçün istifadə olunur. Bu zaman artıq zərbə funksiyalı pilotsuz aparatlar bu vəzifələrdən başqasını da yerinə yetirir. Bu tip pilotsuz aparatları istehsal etməsi və istifadəsi Azərbaycanın hərbi sənayesi üçün yeni nəfəsdir. Bu, orduya daha təkmil kəşfiyyat-zərbə funksiyasının təmini, bu tip silah texnikasının silah bazarlarına çıxışı və ölkəyə qeyri-neft sektorundan gələn maliyyə axınıdır.

Müasir savaş texnologiyalarının arasında bu tip silahlar "gəzən silahlar" toplumuna daxildir. Bu zaman bu tip silahlar bir çox hərbi əməliyyatlar zamanı,"ünsiyyətsiz" yəni insan resursunu qoruyaraq, savaş aparmaq anlayışına malikdir. Bu da hər zaman hərb elminin arzusunda olduğu bir amil idi. Hal-hazırda bu tip silahlar yeni nəsil silahlar olaraq müasir savaş texnologiyası sayılır".

Səxavət Məmməd
Ölkə.Az