“Prezidentə müraciət etdiyim üçün Raqub Məmmədov məni məhkəməyə verib”
Ağdam rayon sakini I qrup hərbi xidmət əlili Rövşən Şıxıyev Ölkə.Az saytına göndərdiyi məktubda rayon icra başçısı Raqub Məmmədovun onu məhkəməyə verməsinin səbəbini açıqlayıb.
R.Şıxıyev Prezident İlham Əliyevə yazdığı açıq məktubun bir nüsxəsini də redaksiyamıza göndərib. Həmin məktubu təqdim edirik:
Möhtərəm Prezident!
Mən hərbi xidmətdə xidmət edərkən xəsarət alaraq ömürlük I qrup əlil olmuşam. Bununla yanaşı mən həmişə çalışmışam ki, dövlətimə, xalqıma yaralı vətəndaş olum. Belə ki, mən Sizin keçirdiyiniz müşavirələrdə səsləndirdiyiniz “korrupsiya elə bir bəladır ki, tək onu inzibati üsullarla aradan qaldırmaq olmur. Burada hər bir vətəndaş dövlət orqanlarına kömək etməlidir” çağrışınıza qoşularaq baş verən korrupsiya halları barədə Sizin ali və mərkəzi ira hakimiyyəti orqanlarının ünvanlarına ərizə və teleqramlar göndərmişəm.
Məqsədim yanlız Sizin çağrışınıza qoşulub dövlətimizin ictimai-siyasi əsaslarını dağıdan korrupsiya hallarının aradan qaldırılmasında dövlət orqanlarına kömək etmək olub. Ancaq bildiyim, rastlaşdığım korrupsiya halları barədə yuxarı orqanlara ərizələr göndərdikdən sonra vəzifəli şəxslər haqq-səsimi boğmaq üçün məhkəməyə verərək mənə qarşı iddialar qaldırdılar. Məhkəmə orqanı isə vəzifəli şəxslərin şəxsi mülahizələrinə əsaslanaraq, konkret faktlar yoxlanılmadan mənim əleyhimə qətnamə çıxardı. Əslində isə məhkəmə şəxsi mülahizələrə deyil, “Vətəndaşların müraciətlərinə baxılması qaydası haqqında” Azərbaycan qanununda nəzərdə tutulmuş qaydada mənim də iştirakım təmin olunmaqla yoxlama aparıldıqdan sonra məni günahkar saymalı idi. Heç bir yoxlamanın nəticəsi olmadan vəzifəli şəxslərin göstərişi ilə məhkəmə qətnamə çıxarmamalıydı.
Nəhayət mən Prezident kimi Sizin ünvanınıza teleqramlar göndərərək Sizin tərəfinizdən qəbul olunmaq istədikdən sonra Ağdam rayon İcra Hakimiyyətinin Başçısı Raqub Məmmədov 31 avqust 2016-cı il tarixdə Ağdam rayon Məhkəməsində mənə qarşı iddia qaldırıb. Bu görünməmiş haldır ki, vətəndaş qəbul olunmaq üçün Prezidentə müraciət edir, icra başçısı vətəndaşı məhkəməyə verir. Bununla vətəndaşın dövlətə inamına və etibarına inam azalır.
Möhtərəm Prezident!
Bir daha Sizə məktubla müraciət edərək xahiş edirəm məni Ağdam rayon İcra Hakimiyyətinin Başçısı cənab Raqub Məmmədovla birlikdə şəxsən qəbul edəsiniz.
İmza: Şıxıyev Rövşən Əyyam oğlu
29.09.2016-cı il
