Direktordan şagirdin döyülməsi ilə bağlı açıqlama
“Müəllimənin şagirdi döyməsi haqda mətbuatda yayılan məlumatlar yalnışdır. Hadisə əslində başqa cür olub, həmin şagird qorxusundan evdə müəllimənin onu döydüyünü deyib”.
Ölkə.Az xəbər verir ki, bu barədə AzVision.az-a Suraxanı rayon 104 saylı orta məktəbin direktoru Kərəm Mehdiyev bildirib. Direktor qeyd edib ki, onun rəhbəri olduğu məktəbdə müəllim şagirdi döyməyib.
“Hadisədən xəbərim var. Müəllim şagirdi döyməyib. Sadəcə yanlış başa düşülüb. Sinifdə uşaqlar bir-birini itələyib. Həmin şagird evdə valideyninə müəllim tərəfindən döyüldüyünü deyib. Valideyni çağırdıq, sinif rəhbəri İradə xanımla birlikdə söhbət etdik. Məlum oldu ki, yalnış anlaşılıb”.
Qeyd edək ki, Suraxanı rayon Polis İdarəsindən verilən məlumata görə, Bakının Suraxanı rayonunda yerləşən 104 saylı orta məktəbdə şagird döyülüb. Tanrıverdi Nəcəfov adlı valideyn Suraxanı RPİ-yə müraciət edərək bildirib ki, oğlu 2006-cı il təvəllüdlü F.N. məktəbdə İradə adlı müəllim tərəfindən döyülüb.
