Şamaxıda şagirdini hamilə qoyan müəllimə hökm oxundu
Şamaxı rayonu Pirbəhli kəndində qeydə alınan biabırçı olayda – şagirdinin hamilə qalmasında adı hallanan müəllim Elnur İbrahimov 5 il 6 ay müddətinə azadlıqdan məhrum edilib.
Ölkə.Az Modern.az-a istinadən xəbər verir ki, bu barədə onun atası Həsənağa İbrahimov məlumat verib.
O, ailəsinin pərən-pərən düşdüyünü qeyd edərək medianı bu məsələni şişirtməkdə qınayıb. Həsənağa İbrahimov deyib ki, hadisə barədə mətbuat bu qədər yazmasaydı, işlər bu səviyyəyə çatmazdı:
“Hamınız istəyinizə çatdınız, oğlum tutuldu. 5 il 6 aylıq həbs edildi. İstəyirsiniz, gəlin məni də tutdurun”.
Xatırladaq ki, Pirbəhli kəndinin Ağsaqqallar Şurasının sədri Hacı Neman Əfəndiyev hadisələrdən sonra qalmaqalda adları hallanan müəllim və şagirdin ailə qurmağa hazırlaşdığını açıqlamışdı.
H.İbrahimov bu faktı təsdiqləyib:
“Bəli, ailələr razılığa gəlmişdi, barışmışdıq. Amma hüquq-mühafizə orqanları, hökumət barışığa heç bir məhəl qoymadı. Heç barışıq sözünü hallandırmadılar da”.
H.İbrahimov dünyaya gələn nəvəsindən xəbərsiz olduğunu bildirib:
“Uşaqdan xəbərimiz yoxdur, görməmişik. Hər şeyi hökumət bilir, biz bilmirik”.
Ata, həmçinin oğlunun həyat yoldaşının 2 uşaqla birlikdə atası evinə getdiyini açıqlayıb:
“Gəlin uşaqlarla birlikdə atası evinə getdi. Hərəsi bir dərədədir. Ailəmiz daha dağıldı”.
Hadisədə adı hallanan müəllim, 25 yaşlı Elnur İbrahimov ailəlidir, 2 övladı var.
Akademik Mirqasımov adına Respublika Klinik Xəstəxanasının doğum şöbəsinin müdiri Zəhra Abbasovanın açıqlamasına görə, 2016-cı ilin iyul ayında qız övladı dünyaya gətirən gənc ana, uşağın atasının həbsdə olmasını əsas gətirərək ondan imtina edib. Uşaq hazırda 1 saylı körpələr evindədir.
