Azər Hüseynov: \"Bakı şəhər heyvanat parkı qışa hazırdır\"
Havaların tədricən soyumasından qışın elə də uzaqda olmamasını aydın hiss etmək mümkündür. Soyuq havada insanlar müxtəlif vasitələrlə şaxtadan qorumağı bacarsalar da, təbiətin digər canlıları olan heyvanlar soyuqlar qarşısında aciz olurlar.
Qışın gəlişi ilə əlaqədar Bakı Heyvanat Parkının direktoru Azər Hüseynovla əlaqə yaratdıq.
Ölkə.az-a danışan heyvanat parkının direktoru qış aylarında heyvanların təhlükəsizliyi üçün görülən qabaqlayıcı tədbirlərdən danışdı.
"İstilik sistemlərinin təmiri, tənzimlənməsi, həmçinin yağıntıların axıtmaması üçün damların təmiri, yataq otaqlarının istilik sistemləri hazır vəziyyətə gətirilib. Bunlar əsasən meymunlara, ilanlara, eqzotik quşlara, yaquara aiddir. Qışa bizim tərəfimizdən bütün hazırlıq tədbirləri görülübdür. Hər il olduğu kimi bu il də qışa hazırlıq işləri yay aylarından start götürüb".
-Heyvanat Parkına yeni heyvanlar gətirilibmi?
- İl ərzində bir neçə yeni heyvanlar gətirilib. Sonuncu dəfə gətirdiyimiz heyvanlar yaquar və italian meymunları olub.
-Bəs itki, heyvan ölümü qeydə alınıbmı?
- Ölüm yaşıyla əlaqədar müəyyən itkilərimiz olub. Xüsusən də quşlarda xırda itkilərimiz olubdur, ancaq böyük heyvanlarda tələf olma faktı, itki qeydə alınmayıb.
-Qışa qida tədarükü necə?
- Bəli, qışa qida tədarükü də görülüb. Yonca otu, arpa, buğda, qarğıdalı, darı kimi yemlər qışa tədarük olunub və hazırda onlar yem anbarlarında saxlanılır.
Xatırladaq ki, 4.25 hektar ərazisi olan parkda 168 növ olan 1193 başdan çox heyvan, quş, sürünən və balıqlar saxlanılır. Bununla yanaşı 47 növə aid 193 baş məməli heyvan, 70 növə aid 400 baş quş, 11 növə aid 34 baş sürünən, 2 növə aid 4 baş suda-quruda yaşayan, və 38 növə aid 562 balıq növü də saxlanılır.
Qeyd edək ki, Bakı şəhər heyvanat parkı ölkədə yeganə mədəniyyət idarəsidir ki, burada əhaliyə istirahət etməklə yanaşı müxtəlif növ heyvanları görməyə və onlarla təmasda olmağa imkan yaradılıb.
Fatimə İbrahimova
Ölkə.az