Bərdədəki "süpürgə olayına" polisdən

İki gündür sosial şəbəkələrdə və mətbuatda Bərdə rayonunda baş verdiyi deyilən "süpürgə olayı" müzakirə mövzusudur

Bildirilir ki, rayonun Hacallı kənd orta məktəbinin şagirdlərindən birinin valideyni “süpürgəpulu” yığılmasına etiraz olaraq, qeyri-adi addım atıb.

Belə ki, dəfələrlə eyni üsulla şagirdlərdən pul yığıldığını görən valideyn 150 süpürgə alaraq, məktəbə hədiyyə edib.

Ölkə.Az məsələylə bağlı Bərdə Rayon Polis Şöbəsiylə əlaqə saxlayıb. Şöbədən bildiriblər ki, rayonda eyni adda üç kənd var.

Hadisəni aydınlaşdırmaq üçün hər üç kəndin icra nümayəndəsi və sahə müvəkkili ilə əlaqə saxladıq, onlar əməkdaşımıza belə bir hadisənin baş vermədiyini, sadəcə "anekdot" olduğunu bildirdilər.

Qeyd edək ki, sözügedən xəbəri modern.az saytı yaymışdı.

İntiqam VALEHOĞLU
Ölkə.Az