Avropa İttifaqının rəsmisi Azərbaycanla əməkdaşlığın bərpa olunmasından

Avropa İttifaqının Şərq Qonşuluğunda Regional Proqramlar Bölməsinin rəhbəri Vassilis Maragos sentyabrın 30-da “Avropa Parlamenti ilə Milli Məclis arasında əməkdaşlıq məsələləri haqqında” qərar layihəsini müzakirə edilərək qəbul edilməsinə münasibət bildirib.

Vassilis Maragos Ölkə.Az-a açıqlamasında Avropa Parlamenti ilə Azərbaycan hökuməti arasında əməkdaşlığın tezliklə icrasına başlanılmasını arzu etdiyini deyib:

“Bu yaxınlarda Azərbaycanla Avropa Parlamenti arasında razılıq əldə olunub. Azərbaycanla əməkdaşlıq üçün tezliklə mandatımız bərpa olunacaq. İnanıram ki, yaxın vaxtlarda Azərbaycanla mövcud olan məhdudiyyət aradan qaldırılacaq. Bu, tərəflər arasında əməkdaşlıq üçün ciddi töhfə olacaq. Biz Azərbaycanla böyük layihələri icra etməkdə maraqlıyıq”.

Bölmə rəhbəri Avropa İttifaqının Bakıdakı Nümayəndəliyinin rəhbəri, səfir Malena Mardın Azərbaycandakı fəaliyyətinə də toxunub:
“Biz səfir Malena Mardın fəaliyyətindən razıyıq. O, burada fəaliyyətini yaxşı əməkdaşlıq üərində qurub”.

V.Maragos Azərbaycanda islahatların aparılmasına dəstək vermək üçün Bakıda olduğunu bildirib:

“Bunun üçün Avropa İttifaqı Azərbaycana dəstək verir. Eyni zamanda bizim öhdəliklərimiz var. Azərbaycanın da bizdən gözləntiləri var. Biz Azərbaycana iqtisadi və nəqliyyat layihələrində dəstək veririk”.

Zaur Əziz
Ölkə.Az