Azərbaycanın Prezidenti Müstəqillik Günü ilə bağlı mərasimdə iştirak edir

Bu gün Heydər Əliyev Mərkəzində 18 oktyabr Azərbaycanın Dövlət Müstəqilliyinin 25 illik yubileyi münasibətilə təntənəli mərasim keçirilir.

Ölkə.Az saytının əməkdaşının verdiyi məlumata görə, mərasimdə Azərbaycan Prezidenti İlham Əliyev və onun ailə üzvləri, hökumət və dövlət rəsmiləri, millət vəkilləri və elm xadimləri iştirak edirlər.

Tədbirdə Azərbaycan Prezidenti İlham Əliyevin çıxışı nəzərdə tutulub.

Xatırladaq ki, 18 oktyabr Azərbaycanın Dövlət Müstəqilliyi günüdür. 1991-ci il oktyabrın 8-də Azərbaycan Ali Sovetinin işə başlanan növbədənkənar sessiyası 4 gün müzakirələr aparıb. Nəhayət, 1991-ci il oktyabrın 18-də Ali Sovetin sessiyasında tarixi sənəd - Dövlət Müstəqilliyi haqqında Konstitusiya Aktı qəbul edilib.

Həmin vaxt aktın lehinə Ali Sovetin 360 deputatından 258-i səs verir, yerdə qalanlar ya sessiyaya qatılmayıb, ya da onun əleyhinə səs veriblər. Konstitusiya Aktında göstərilib ki, müstəqil Azərbaycan dövləti 1918-1920-ci illərdə mövcud olmuş Azərbaycan Xalq Cümhuriyyətinin hüquqi varisidir. Konstitusiya Aktı 6 fəsil, 32 maddədən ibarətdir.

1991-ci il dekabrın 29-da ümumxalq referendumunda məsələ müzakirəyə çıxarılıb və əhalinin 95 faizi səsvermədə iştirak edərək ölkənin müstəqilliyinə, suverenliyinə və istiqlaliyyətinə səs verib.

Azərbaycanın müstəqilliyi bərpa olunandan sonra dövlət bayrağı, himni və gerbi haqqında da qanunlar qəbul edilib.

Zaur Əziz
Ölkə.Az