\"Küçələrdə bir damcı da su qalmayacaq\"

“Bu gün səhər saatlarında Bakıda yağıntının güclənməsi bəzi küçələrdə müəyyən su yığılmalarına səbəb olub. Lakin işçilərimiz, həm qəza briqadaları, həm texnikalarımız ərazilərə baxış keçirir, vəziyyətə nəzarət edirlər”.

Ölkə.Az xəbər verir ki, bunu AzVision.az-a “Azərsu” ASC-nin mətbuat xidmətinin rəhbəri Anar Cəbrayıllı bildirib. Qurum rəsmisi qeyd edib ki, Dərnəgül yolu, Ziya Bünyadov prospekti, “Ramstore” marketin yaxınlığı, Babək prospekti, Binəqədi rayonu, Xırdalan şəhərində müəyyən qədər problemlər yaranıb və su yığılmaları var. 

“Yağış sularının toplanması kanalizasiya problemləri ilə bağlı deyil. Kanalizasiya xəttində problem olsaydı, dünən də su yığılardı. Xətlər işlək vəziyyətdədir. Sadəcə intensiv yağıntılar zamanı yağış suları kanalizasiya xətlərinə daxil olur. Ona görə də xətlər çatdırmır. Böyük ərazilərdə kanalizasiya quyularında qaynama baş verə bilər. Bu isə suyun çoxluğundan olur. Xırdalan, Binəqədi, Zığdakı kanalizasiya stansiyalarımız gücləndirilmiş rejimdə çalışır. Yağış dayanandan yarım, bir saat sonra küçələrdə yağış sularından bir damcı da qalmayacaq”.

A.Cəbrayıllı bildirib ki, yağış sularının yığılmamasının köklü həlli Bakı şəhərində yağış sularının axıdılması üçün sistemlərin yaradılmasıdır. 

“Bakı şəhərinin 12 faiz küçə və prospektlərində yağış suları barmaqlıları var. Bu barmaqlıların böyük əksəriyyəti kanalizasiya xətlərinə qoşulur. Bakının ətrafında kifayət qədər göllər və Xəzər dənizi var. Yağış suları ayrıca çəkilib, göllərə, Xəzər dənizinə axıdılsa, təmizlənməyə ehtiyac olmaz. Yağış suları təmiz sulardır. Lakin yağış suları tullantı sularına qarışır və məcburən Hövsana yönəldirik və yenidən təmizlənir. Yağış sularının axıdılması üçün sistemin yaradılması yol infrastrukturu ilə birgə aparılmalıdır”.

Ölkə.Az