Qubaya güclü qar yağdı
Qubaya yağan güclü qar rayonun 8 kəndi ilə nəqliyyat əlaqəsini kəsib.
Ölkə.Az xəbər verir ki, oktyabrın 16-dan 17-nə keçən gecədən başlayaraq yağan yağış sonra qara çevrilib.
Xınalıq kənd sakinlərinin verdiyi məlumata görə, qarın hündürlüyü 50 santimetdən çoxdur. Hazırda qonşu kəndlərdə də eyni vəziyyətdir.
Buduq kəndi Böyük Qafqaz silsiləsində olduğu üçün orada qarın hündürlüyü daha çoxdur. Burada qarın hündürlüyü 55 sm-dir. Hazırda qarın yağması davam edir.
Quba FHK Komissiyasının sədri Yusif Abidov "Report"a açıqlamasında bildirib ki, "qar güclənsə, çətinliklər yaranacaq, ancaq bununla bağlı tədbirlər görüləcək".
***
Quba rayonunun dağətəyi kəndlərinə ilk qar yağıb.
"Report"un Şimal bürosunun məlumatına görə, rayonun dağlıq ərazilərinə ilk qar bir neçə gün bundan əvvəl yağsa da, dağətəyi kəndlərə birinci qar bu gün yağıb.
Hazırda rayonun Buduq, Xınalıq və Qrız kəndlərində yağıntı davam edir. Sakinlərin sözlərinə görə, yollarda nəqliyyatın hərəkətində çətinliklər yaranıb.
"Report" Qubanın Xınalıq və digər dağətəyi kəndlərinə ezam olunan əməkdaşının hazırladığı videoreportajı təqdim edir.
