Vüsal Qarayev: "Dünən rişxənd edənlər, bugün bizə həsəd aparır"
Bu gün AXCP-nin Ehtimad Qurultayı keçirməsindən bir il ötür.
Xatırladaq ki, bir il öncə partiyada Əli Kərimli idarəçiliyindən narazı olan bir hissə ayrılaraq qurultay keçirdilər və AXCP tarixində ikinci dəfə gizli səsvermə yolu ilə Razi Nurullayev partiya sədri seçildi.
Bəs bu bir ildə partiyanın fəaliyyəti nədən ibarət olub, bu barədə AXCP-nin mətbuat katibi Vüsal Qarayev Ölkə.az-a məlumat verib verib. O bildirib ki, bir il öncə onlara rişxəndlə yanaşanlar, bu gün fəaliyyətlərinəbaxıb həsəd aparırlar:
“Bəli, AXCP-nin möhtəşəm qurultayından bir il ötdü. Bu işə başlayanda, yəni AXCP-ni yenidən daha güclü, daha demokratik partiya kimi formalaşdırmağı qarşımıza məqsəd qoyanda çoxları bu məqsədimizə çatmayacağımızı düşündülər, rişxəndlə yanaşdılar, inanmadılar, fəaliyyətimizin qısa sürəcəyini iddia etdilər. Bu tip düşüncələrə ilk olaraq keçirdiyimiz möhtəşəm qurultayla zərbə vurduq. Və AXCP tarixində Əbülfəz Elçibəydən sonra ilk dəfə tam demokratik, gizli səsvermə yolu ilə sədr seçdik, Razi Nurullayev partiya sədri oldu. Eyni zamanda partiya tarixində ilk dəfə nizamnaməyə dəyişiklik edib, ömürlük sədr ənənəsini ləğv etdik”.
Vüsal Qarayev qeyd edib ki, gün keçdikcə partiya təşkilatlanır, sıralarını gücləndirir, fəaliyyətlərini genişləndirir:
“Bu bir il ərzində güclənməkdə davam etdik, bir çox rayon şöbələri yaratdıq, yaratmaqda da davam edirik. Üzvlərimizin sıraları hər gün genişlənir və güclənir. Eyni zamanda ölkənin siyasi-iqtisadi böhrandan çıxması üçün bir birinin ardınca təkliflər paketi hazırlayıb hökumətə təqdim etdik. Bu təkliflərin bəzilərinə rəsmi cavab gəldi. Eyni zamanda hökumət k apardığı bəzi islahatlarında partiyamızın təkliflərinindən də yararlandı. Partiya olaraq ölkədə və dünyada baş verən bütün hadisələrə reaksiya veririk, münasibətimizi bildiririk. Ölkədəki bütün çatışmazlıqla, sosial, siyasi, iqtisadi problemlərə qarşı münasibətimizi, iradımızı açıq şəkildə bildiririk. Hazırda sürətlə təşkilatlanmağa, güclənməyə davam edirik. Hədəflərimiz çox yüksəkdir. Əsas hədəf isə Azərbaycan vətəndaşının azad, demokratik bir ölkədə, sosial rifah içərsində yaşamasıdır”.
