Vitse-spiker: "Ermənistan status-kvonu saxlamaq üçün silahlanır"
"Ermənistan status-kvonu saxlamaq üçün silahlanır, Azərbaycan torpaqlarında hərbi təlimlər keçirir"
Bunu Ölkə.Az-a açıqlamasında Milli Məclis Sədrinin müavini, ATƏT-in Parlament Assambleyasında Azərbaycan nümayəndə heyətinin rəhbəri Bahar Muradova bildirib.
Vitse-spiker deyib ki, Ermənistan ordusuna çağırılmış hərbçilər bu gün Azərbaycan ərazilərində xidmət edirlər. Onun sözlərinə görə, bütün bunlar dünya birliyi üçün yenilik deyil:
"Ona görə də mövqeyimizi bütün istiqamətlərdə beynəlxalq ictimaiyyətin diqqətinə çatdırmaqda davam etməliyik. Həmçinin, bu məsələ ATƏT və digər beynəlxalq təşkilatların tədbirlərində gündəmə gətirilməlidir və gətirilir. Ancaq çox təəssüf ki, Azərbaycanın bu səyləri vəziyyəti dəyişməyib. Bu məsələnin haqqında danışmaq, hələ onu həll etmək demək deyil. Məsələnin həlli üçün ciddi addımlar atılmalıdır. Bir addım atılması üçün isə cavabdeh olan və məsuliyyət daşıyan beynəlxalq təşkilatlar öz sözünü deməlidir".
B.Muradova qeyd edib ki, Ermənistanın Azərbaycana qarşı hərbi təcavüzü və işğal etdiyi ərazilərdə silahlanması daim diqqətdə saxlanılır:
"Azərbaycan tərəfi Ermənistanın Azərbaycana qarşı hərbi təcavüzünü və işğal etdiyi ərazilərdə silahlanmasını beynəlxalq tədbirlərdə və görüşlərdə vurğulayır. Şübhəsiz ki, bu addımlar gələcəkdə də davam etdiriləcək. Bir halda ki, Ermənistan işğalçı siyasət yürüdərək Azərbaycan ərazilərini hərbi təcavüz altında saxlayırsa və indiyədək işğala son vermirsə, indi onun silahlanması da adiləşib. Çünki Ermənistana illərdir ki, silahlar verilir, bağışlanır, hərbi yardımlar olunur. Bunun nəticəsində də Ermənistan illərdir ki, Azərbaycana qarşı işğalçılıq siyasəti həyata keçirir. Bu da təcavüzkar siyasətin görüntüsüdür".
B.Muradova həmçinin vurğulayıb ki, ATƏT Parlament Assambleyası siyasi institut olsa da, ancaq Dağlıq Qarabağ münaqişəsinin həlli ilə bağlı xüsusi təsir gücü və mövqeyi olan təşkilat deyil:
"ATƏT Parlament Assambleyasının növbəti toplantısı isə gələn ilin fevral ayında keçiriləcək. Azərbaycan tərəfinin ATƏT Parlament Assambleyasının toplantılarında hər hansı məsələ qaldırmasının prezidentlərin görüşünə təsir göstərəcəyini düşünmürəm. Ona görə də Dağlıq Qarabağla bağlı mövcud vəziyyət və bu məsələyə göstərilən münasibət dəyişməlidir ki, prezidentlərin görüşləri də intensivləşsin və bu cür görüşlər səmərəli nəticələr versin. Bütün bunlar olarsa, münaqişənin həllində də müsbət dəyişikliklər ola bilər".
Vitse-spiker ATƏT-in Minsk qrupunun Fransadan olan həmsədrinin yenisi ilə əvəz olunmasına da toxunub:
"Bu məsələdə Fransanın özünəməxsus mövqeyi var. Bu mövqe Fransa dövlətinin mövqeyidir. Ona görə də ATƏT-in Minsk qrupunda kimin təmsil olunmasından asılı olmayaraq, Fransanın mövqeyi ifadə olunur.
Digər həmsədr ölkələrdə olduğu kimi, Fransanın da indiyədək bir neçə nümayəndəsi dəyişib. Ancaq onların yanaşmasında hər hansı ciddi dəyişiklik olmayıb. Çünki təyin olunan şəxsin ortaya fərqli mövqe qoymaq imkanı yoxdur.
Digər tərəfdən isə əgər Fransa Dağlıq Qarabağ münaqişəsinin həlli ilə bağlı münasibətini dəyişmək istəsə, onu kimin təmsil etməsinin elə ciddi əhəmiyyəti yoxdur. Bütün bunlara görə də Fransanın ATƏT-in Minsk qrupundakı həmsədrini dəyişməsi böyük hadisə kimi qəbul edilməməlidir. Düşünürəm ki, Fransa indiyədək olan mövqeyini davam etdirəcək. Odur ki, başqa ciddi dəyişiklik gözləmirəm".
Zaur Əziz
Ölkə.Az
