Tanınmış ziyalı əməliyyata hazırlaşır
Gorkəmli Azərbaycan jurnalisti, yazıçı və publisist, uzun illər Dövlət Televiziya və Radio Verilişləri şirkətində çalışmış İntiqam Mehdizadə əməliyyat olunacaq.
Mediafax.Az-ın əldə etdiyi məlumata görə, İ.Mehdizadə son günlər ona əziyyət verən xəstəlikdən xilas olmaq üçün oktyabrın 25-də cərrahiyyə əməliyyatı olunmaq üçün həkimlərə müraciət edəcək. Lakin onun Bakıda, yaxud hansısa xarici ölkədə əməliyyat olunacağı bəlli deyil.
İntiqam Mehdizadə 1945-ci ildə İsmayıllı şəhərində anadan olub. Azərbaycan Dövlət Universitetinin jurnalistika fakültəsini bitirib. Üç il "Azərbaycan gəncləri" qəzetində işləyəndən sonra, 1973-cü ildə Azərbaycan SSR Dövlət Televiziya və Radio Verilişləri Komitəsində redaktor vəzifəsinə təyin olunub. Burada böyük redaktor, şöbə müdiri, baş redaktor vəzifələrinə qədər yüksəlib. "Gənclik və idman" redaksiyasına rəhbərlik edib.
5 kitab müəllifidir. "Karvanın sarvanı" adlı iri həcmli məqalələr toplusu "Ozan" nəşriyyatında çapa hazırlanır.Respublika Mətbuat Fondunun "Dan Ulduzu", Jurnalistlər Birliyinin H.B.Zərdabi adına və "Qızıl qələm" mükafatları laureatıdır.
Hal-hazırda Azərbaycan Mədəniyyət və İncəsənət Universitetinin mətbuat katibi vəzifəsində çalışmaqla, həm də tələbələrə ssenari yaradıcılığı, ekran dramaturgiyası, ədəbi iş fənlərindən dərs deyir.
Evlidir, iki övladı, iki nəvəsi var.
