Vahid Əhmədov: “Heydər Əliyev kimi şəxsiyyətlər tarixə 100 ildə bir dəfə gəlir”

“Ötən əsrin 90-cı illərinin əvvəlində Heydər Əliyev hakimiyyətdə olsaydı, Azərbaycan daha tez müstəqillik qazana bilərdi”.

Bu fikirləri Ölkə.Az-a açıqlamasında Azərbaycanın Baş nazirinin sabiq birinci müavini (1992-1994-cü illərdə), Milli Məclisin deputatı Vahid Əhmədov bildirib.

V.Əhmədov deyib ki, Heydər Əliyev uzaqgörən və dünyada tanınan ağıllı siyasətçi olub:

“Mən Azərbaycanın dövlət müstəqilliyinin bərpa olunması üçün səs verən millət vəkillərindən biri olmuşam. O dövrü də çox yaxşı xatırlayıram. Heydər Əliyev fenomen şəxsiyyət olub. Belə şəxsiyyətlər tarixə 100 ildə bir dəfə gəlir. Əlbəttə ki, əgər o olmasaydı, Azərbaycanda proseslər başqa cür də gedə bilərdi. Onun Naxçıvanda Ali Məclisə seçilməsi və ilk dəfə olaraq üçrəngli bayrağımızı zala gətirtməsi və təsdiq etdirməsi kimi xidmətləri olub. 1991-ci ildə Azərbaycanda SSRİ-nin saxlanılması ilə bağlı keçirilən referendumda səs verən 43 deputatdan biri də Heydər Əliyev olub. O dövrdə baş verən proseslər o qədər sürətlə gedirdi ki, ona müdaxilə etmək həddindən çox çətin idi. Biz həmin proseslərin içində olmuş adamlarıq. Təbii ki, həmin dövrdə Heydər Əliyev hakimiyyətdə olsaydı, o, uzaqgörən siyasətçi və dünya siyasətində xüsusi yeri olan bir insan kimi daha fərqli siyasət aparardı. Bu zaman Azərbaycan daha tez müstəqillik əldə edə bilərdi”.

Ötən sərin 90-cı illərində Ayaz Mütəllibovun Heydər Əliyevə qarşı təzyiqlər göstərməsi ilə bağlı səslənən bir sıra fikirlərə də toxunan V.Əhmədov qeyd edib ki, həmin vaxt Azərbaycanda rəhbər olmuş digər adamlar da Azərbaycanın müstəqilliyini istəyən şəxslər olub:
“Ancaq onlar SSRİ zamanında təcrübə qazanmış, SSRİ-yə bağlı insanlar idi. Ona görə də müəyyən gərginliklər var idi. Ona görə də belə addımlar atıldı. Ümumiyyətlə, mən bu məsələləri dərindən izləməmişəm. Ancaq Ayaz Mütəllibov Azərbaycanın dövlət müstəqilliyinə imza atmış prezidentdir. Biz bunu istəsək də, istəməsək də, Azərbaycanın ictimi-siyasi həyatında Ayaz Mütəllibovun da rolu olub. Yəni, bu insan Azərbaycanın dövlət müstəqilliyi aktına prezident kimi imza atıb. Bunu unutmaq lazım deyil. Həmin dövrdə onun Heydər Əliyevə qarşı təzyiqlər etməsi ilə bağlı müəyyən fikirlər səslənsə də, ancaq Ayaz Mütəllibov Heydər Əliyevin kadrı olub, Heydər Əliyevin sayəsində yüksək vəzifələrə qalxıb. Bu məsələ ilə bağlı müəyyən fikir mübadiləsi ola bilər. Ancaq birbaşa Ayaz Mütəllibovun Heydər Əliyevin əleyhinə çıxış etməsinin şahidi olmamışam”.

Xatırladaq ki, YAP-çı millət vəkili Siyavuş Novruzov Ayaz Mütəllibov hakimiyyətinin 1990-1991-ci illərdə Heydər Əliyevə qarşı açıq təzyiqlər göstərdiyini və onu Bakıya buraxmadığını bəyan edib.

Zaur Əziz
Ölkə.Az