Orta Asiyada daşnak qırğınlarını tədqiq edən özbək alimin yeni kitabı təqdim olundu
Daşnakların Fərqanədə törətdikləri qırğınları təqiq edən görkəmli özbək tarixçisi Şuxrat Barlas ilə Prezident Kitabxanasında görüş keçirilib.
Xatırladırıq ki, özbək alimin Azərbaycan auditoriyası ilə ilk tanışlığı Ölkə.Az saytında onun məqaləsinin ilk dəfə Azərbaycan dilində dərc olunmasından sonra tanış olub. Müəllifin iki il bundan əvvəl saytımızda dərc olunan "Erməni daşnakları və qırmızı bolşevik terrorçuların törətdiyi Türküstan qırğınları — I HİSSƏ və II HİSSƏ" başlıqlı iki məqaləsindən sonra, Azərbaycan oxucusu onunla tanış oldu və daşnak terrorunun Azərbaycandan əvvəl Orta Asiyada dinc türk-müsəlman əhalisinə tutduğu divan haqqında məlumat əldə etdi.
Erməni daşnakları və qırmızı bolşevik terrorçuların törətdiyi Türküstan qırğınları — I HİSSƏ
Erməni daşnakları və qırmızı bolşevik terrorçuların törətdiyi Türküstan qırğınları — II HİSSƏ
Daha sonra, keçən ilin dekabr ayında Şöhrət Barlas "Türküstan və Cənubi Qafqaz XIX-XX əsrlərdə. Daşnaklar: Fərqanədən Qarabağadək" kitabı Daşkənddə işıq üzü gördükdən sonra Azərbaycan mətbuatına ilk müsahibəsini məhz Ölkə.Az-a vermiş Azərbaycan oxucusu onun ilk işi ilə tanış olmuşdu.
Özbək tarixçisi: "Erməni daşnakları üç ay ərzində Fərqanədə 35 000 dinc özbək öldürüblər" — MÜSAHİBƏ
Bu gün, oktyabrın 25-də Prezident Kitabxanasında keçirilən Tarix İnstitutunun genişləndirilmiş Elmi Şurasında Özbəkistanın görkəmli tədqiqatçı alimi Şuxrat Salamovla (Şuxrat Barlas) görüş olub.
Elmi Şurada Tarix İnstitutunun direktoru, AMEA-nın müxbir üzvü Yaqub Mahmudov Azərbaycan və özbək xalqları arasındakı əlaqələrin dərin tarixi köklərə malik olmasından danışıb və Ş.Salamovu tədbir iştirakçılarına təqdim edib.
Şuxrat Barlas tədbirdə “Daşnaksütyun Azərbaycan və Türküstanda soyqırımların təşkilatçısı kimi” mövzusunda məruzə ilə çıxış edib. O, çıxışında bildirib ki, erməni millətçiləri Azərbaycan torpaqlarında, Gürcüstanda,
Özbəkistanda müxtəlif zamanlarda ağır cinayətlər, qırğınlar, terror aktları törədib, soyqırımları həyata keçiriblər: “Bolşevik terroru nəticəsində Türküstanda milyonlarla insan öldürülüb. Bu qırğında erməni daşnaklarının rolu böyükdür. Dinc əhalinin vəhşicəsinə qırılması əsl terrordur, etnik təmizləmədir və soyqırımdır”.
Daha sonra tədbirdə özbək tədqiqatçının “Türküstan və Cənubi Qafqaz XIX-XX əsrlərdə. Daşnaklar: Fərqanədən Qarabağadək” və “Qarabağ: ideyalar müharibəsi” kitablarının təqdimatı olub.
Təqdimatda bildirilib ki, “Türküstan və Cənubi Qafqaz XIX-XX əsrlərdə” kitabında böyük regional dövlətlərin öz geosiyasi məqsədlərinə çatması üçün erməni amilindən istifadə etməsi, Türküstanda, həm də Cənubi Qafqazda, Kiçik Asiyada türk etnosuna qarşı aparılan soyqırımı siyasəti tarixi faktlarla sübut olunur. Qeyd edək ki, ermənilərin türk xalqlarına qarşı törətdikləri cinayətlərdən və soyqırımı siyasətindən bəhs edən bu qiymətli əsər Orta Asiyada bu mövzuda yazılan ilk tədqiqat işidir.
Müəllifin sözlərinə görə, bu kitabda Ermənistan-Azərbaycan, Dağlıq Qarabağ münaqişəsindən də bəhs olunur, ermənilərin ölkəmizə qarşı ərazi iddiaları irəli sürməsi tutarlı faktlarla ifşa edilir, tarixi Azərbaycan torpağı olan İrəvan xanlığının ərazisində Ermənistan adlı dövlətin yaradıldığı vurğulanır.
Tarix İnstitutunun direktoru isə qeyd edib ki, “Qarabağ: ideyalar müharibəsi” kitabında erməni daşnaklarının öz havadarlarının köməyi ilə necə ideyalar irəli sürdükləri, insanları ideoloji müharibəyə necə hazırladıqları barədə tarixi faktlar əksini tapıb:
“Təkzibolunmaz və çoxsaylı arxiv sənədləri sübut edir ki, XX əsrin əvvəllərində böyük dövlətlərin fəal köməyi ilə terrorçu-ekstremist erməni təşkilatlarının Azərbaycan, Şərqi Anadolu və Mərkəzi Asiyanın türk-müsəlman əhalisinə qarşı həyata keçirdiyi soyqırımları dünya tarixinin ən dəhşətli soyqırımlarıdır”.
Tədbirdə özbək qonaq bunları deyib: “Biz bilirik ki, Azərbaycan ordusu qısa bir zamanda müharibə yolu ilə nəinki öz torpaqlarını işğaldan azad edər, hətta İrəvanı da ala bilər. Amma azərbaycanlılar uşaqları, dinc əhalini öldürməzlər. Multikultural dəyərlərə üstünlük verən Azərbaycan sülhsevərliyi ilə dünyada tanınır”.
Görüşün sonunda görkəmli özbək alimi Ş.Barlasa Tarix İnstitutunun fəxri doktoru adı verilməsi haqqında institutun elmi şurasının qərarı səsləndirilib və ona fəxri doktor diplomu təqdim olunub.
