"Girovların o şəkildə məhkəmə zalına gətirilməsi heç bir beynəlxalq hüquq prinsiplərinə uyğun deyil"
Ermənilərin girov götürdüyü azərbaycanlılar Şahbaz Quliyev və Dilqəm Əsgərovun məhkəməsi bu gün baş tutub. Erməni mətbuatının yaydığı məlumata görə, girovlarımız məhkəmə zalına gözü bağlı gətirilib. Ən diqqət çəkən məqamlardan biri də odur ki, onların müdafiəsi erməni vəkillərinə həvalə olunub.
Məsələ ilə əlaqədar mövzuya xüsusi diqqət göstərən millət vəkili Sahib Alıyevlə əlaqə yaratdıq. Millət vəkili məsələyə münasibətini Ölkə.az-la bölüşdü.
"Ümumilikdə girovların o şəkildə məhkəmə zalına gətirilməsi heç bir beynəlxalq hüquq prinsiplərinə uyğun deyil. Xatırlatmaq istəyirəm ki, ermənilər girovlarımızı öncə oğurluq etməkdə günahlandırdılar. Daha sonra isə üzərilərinə təzyiq etməklə onları bəyanat yazmaqda məcbur ediblər. Bu açıq şəkildə təzyiq faktıdır. Onlar öz Vətənlərini ziyarət etməyə gedən adi vətəndaşlardır, ancaq ermənilər onları dünya ictimaiyyətinə diversant kimi təqdim edir. Mən girovlarımızı bəyanat yazmağa, ya da bu mövzuda hər hansı etiraf etməyə məcbur etmələrinə təəccüblənmədim. Ümumilikdə girovlar təbeiçilik altında olan insanlardır və Ermənistan tərəfindən onlara qarşı bu cür hüquq pozuntularının olması əslində gözlənilən idi.
Qeyd edim ki, Dilqəm Əsgərov Rusiya vətəndaşıdır. Rusiya hər zaman vətəndaşlarına qarşı hüquq pozuntularının qarşını alıb. Ümid edirəm ki, Rusiya tərəfi Dilqəm Əsgərova qarşı da humanist davranacaq.
"Bəs sosial şəbəkədə kompaniyası başlanmış "Girovları azad et" virtual flaşmob aksiyasında vətəndaşların aktivlik göstəricisi necədir?
Artıq yarandığı dəqiqədən etibarən 8000-dən çox istifadəçi flaşmobun iştirakçısı olub. Əminliklə deyə bilərəm ki, flaşmobda iştirak etməyənlər də bir neçə dəqiqədən sonra məmuniyyətlə sıralarımıza qoşulacaqlar. İştirak qaydaları barədə bir neçə dəfə izah versək də, hələ ki, bu barədə sual ünvanlayan insanlarla qarşılaşırıq. Sual ünvanlayan hər kəsə isə yorulmadan izah etməyə hazırıq.
Sevindirici haldır ki, aksiyaya qoşulanlar sırasında gənclər üstünlük təşkil edir. Bu isə o deməkdir ki, həmin gənclər heç o torpaqları görməsələr də, ətrini duymasalar da olduqca həvəslidirlər. Bu çox sevindirici haldır.
Ümid edirəm, vətəndaşlarımızın və gəncliyimizin dəstəyi ilə istədiyimizə nail olacağıq".
Fatimə İbrahimova
Ölkə.az
