"Al-Əlvan Qarabağ" adlı layihənin açılış mərasimi keçirilib
Azərbaycan Respublikasının Prezidenti Yanında Gənclər Fondunun maliyyə, Virtual Qarabağ İKT mərkəzinin, Binəqədi rayon Gənclər və İdman İdarəsinin, “Zəka” Gənclərin İntellektual İnkişaf və Yaradıcılıq Mərkəzinin, “Sağlam Düşüncə” Gənclər təşkilatının, IB Club Gənclərin İnkişaf Mərkəzinin və “Park Bulvar” AVM-in tərəfdaşlığı ilə VIII-qrant müsabiqəsi çərçivəsində qalib olmuş Al-Əlvan Qarabağ adlı layihənin açılış mərasimi keçirilib.
Binəqədi rayon Gənclər Evində Qarabağ xalçaçılıq məktəbinin ənənələrini yaşatmaq və gənc nəslə aşılamaq üçün həyata keçirilən “Al-əlvan Qarabağ” şüşə üzərində rəsm layihəsi çərçivəsində növbəti sərgi keçirilib.
Layihənin rəsmi hissəsində “Zəka” Gənclərin İntellektual İnkişaf və Yaradıcılıq Mərkəzinin baş direktoru Güllü Atakişiyeva layihənin əsas məqsədini qeyd edərək, gənclər üçün önəmindən danışıb. Azərbaycan xalçaçılıq sənətində QARABAĞ xalçaçılıq məktəbinin özünəməxsus dəsti-xəttinin geniş ictimaiyyətə çatdırılmasının hər bir azərbaycanlının vətəndaşlıq borcu olduğunu qeyd edib.
Daha sonra Binəqədi rayon Gənclər və İdman İdarəsinin rəisi Qüdsi Bayramov çıxış edərək Azərbaycanın qədim və zəngin ənənələrə malik xalçaçılıq irsinin öyrənilməsində və gənclər arasında təbliğində belə layihələrin, tədbirlərin və sərgilərin əhəmiyyətini yüksək qiymətləndirib.
Daha sonra Virtual Qarabağ İKT mərkəzinin rəhbəri Nurəddin Mehdiyev çıxışında Qarabağ xalçalarının tarixindən danışıb. N.Mehdiyev bildirib ki, hələ X əsrdən başlayaraq yun və pambıq emalı ilə məşğul olan iri sənətkarlıq mərkəzi kimi tanınan Qarabağın həm dağlıq, həm də aran zonalarında xalçaçılıq sənəti özünəməxsus xüsusiyyətləri ilə fərqlənən inkişaf yolu keçib. Tarixi inkişaf prosesində Qarabağ xalçaçılıq məktəbi öz spesifikliyini qoruyub saxlayıb. Bu xalçaların bədii tərtibatında həndəsiləşdirilmiş nəbati naxışlar, rəmzi xarakterli rəsmlər, dekorativ və təsviri sənətin müxtəlif sahələrindən götürülmüş kompozisiyalar daxildir.
Qeyd edək ki, layihənin məqsədi Qarabağ xalçaçılıq məktəbinin spesifikliyini rəsm sənəti ilə gənclərə təbliğ etməkdir.
Açılış mərasiminin ardınca şüşə üzərində Qarabağ xalçaları təsvir olunmuş rəsm əsərləri nümayiş olunub. Qeyd edək ki, sərgidə 25 əsər nümayiş etdirilib və sərgiyə baxış keçirildikdən sonra əsərlər səsvermə nəticəsində müəyyənləşdirilib. Ən çox səs toplamış 3 əsərin qalibi seçilərək onlara plaket təqdim olunub. Sərginin sonunda sərgiyə təqdim olunan əsərlərin müəllifləri sertifikatlarla təltif olunub.
Layihə çərçivəsində növbəti sərgi 15.10.2016 tarixində Park Bulvar alış-veriş mərkəzində baş tutub. Geniş ictimaiyyətə açıq olan sərgi alış-veriş mərkəzinə gələn əhalinin diqqətini cəlb edib.
