Niyə şirkətlər stresə dözümlü işçi axtarır?

Stress iş və həyatımızın ayrılmaz bir hissəsinə çevrilib.

Son zamanlar iş elanı ilə bağlı vakansiyalara baxanda tələblərdən biri də, "stress altında işləmək" bacarığıdır. Xüsusən də bank sektoru ilə bağlı vakansiyaların hamısında bu tələbi görmək olar.

Ümumiyyətlə "stress altında işləmək" həm də o anlama gəlir ki, müdir əsəbləşə bilər, qışqıra bilər, işçi isə buna dözməli, gülümsəməlidir.

Şirkətlərin işçi axtararkən "Stress altında işləmək" tələbi qoyması barədə Neyro Linqvistik Proqramlaşdırma (NLP) mütəxəssisi Babək Bayramov fikirlərini Ölkə.Az-la bölüşüb:

"Bu cür tələb bütün vakansiyalarda yox, amma çoxusunda olur. Stress altında işləmək dedikdə fikirlərini doğru ifadə edə bilmədiklərindən də ola bilər. Bu tələbi "stresi idarə etməyi bacar" mənasında qoyurlar. Bir çox işlər var ki, onların həqiqətən də stress yükü həddindən artıq çoxdur. Bunu bildiklərinə görə şirkətlər daha dözümlü personal axtarırlar. Bu, "bir problemin olduğunu əvvəlcədən qəbul edirik, o problemlərə dözəcək insanların axtarılmasına yola çıxırıq" deməkdir. Əgər bir stress varsa o stresi yox eləmək lazımdır, sonra işçi axtarmaq lazımdır.

Əslində bəzən aqressiv davranışları, kiməsə hirslənməyi işinin tərkib hissəsi hesab edən müdirlər var. Bu istisna olunmur. Bəzi müdirlər özünü daha əsəbi insan kimi hiss etdirmək istəyir, səbirsiz insan olduğunu göstərmək istəyir. Bunlar əslində saxta kimliklərdir. Əsəbi insan doğulmur, əsəbi adam olmur. Əsəbi adam sonradan yaradılan bir şeydir, özümüzə vurduğumuz etiketlər, şərlərdir. Əgər adam özünü bu cür hiss edirsə, əsəbi olduğuna inanırsa əsəbi davranışları da ortaya çıxa bilir. Xüsusən də öz işçilərinə əsəbini tökməyi bacarır.

İş dünyasında insanlar əvvəlki dövrlərə nisbətən daha çox kompleksləri, dünyadan daha çox gözləntiləri var. İnternet, sosial media elə bir vəziyyətə gətirib ki, davamlı olaraq özümüzü müqaysə edirik, ABŞ-da iş yerlərində stress otağı var. O stress otağında müdirin maketi olur, kimsə əsəbləşirsə gedib o stress otağında müdirin maketini yumruqlayır. Bu cür məlumatların yayılması personalda da gözləntiləri artırır. Bu gözləntilər də yerinə gəlməyəndə stress yaranır. Hər iki tərəfin gözləntiləri çox olanda stress artır".

Səxavət Məmməd
Ölkə.Az