Direktordan müavini haqda ilginc sözlər: "Arxasında rəis var"
Son günlər mətbuatın gündəmində olan 230 saylı orta məktəbin direktoru bu gün kollektivlə vidalaşıb.
Xatırladaq ki, kollektivin Ölkə.Az-a ünvanladığı məktubda direktor müavini Ləman Babayevanın Elşən Qafarovu onu zorlamaqda ittiham etdiyi və sonradan bunun yalan olduğunu söylədiyi qeyd olunurdu. Bu gün vəzifəsindən istefa verən Elşən Qafarov bu və digər məsələlərlə bağlı Ölkə.Az-ın suallarını cavablandırıb.
- Elşən müəllim, istərdik əvvəlcə işdən çıxmağınızdan danışaq...
- Başqa bir işə keçməyimlə əlaqədar 230 saylı orta məktəbin direktoru vəzifəsindən çıxmaq istəməyim barədə ərizə yazdım.
- Kollektivin qərarınıza münasibəti necə oldu?
- Kollektiv xeyir-dua verdi, bir-birimizlə halallaşdıq və getmək səbəbimi dedim. Onlar da son illər gördüyüm işlərdən xəbərdardırlar. Əgər bu gün təhsil mütəxəssisi kimi tanınıramsa, bu, həmin məktəbin kollektivinin hesabınadır. Çox səmimi söhbətlər etdik.
- Keçmiş müavininiz Ləman Babayeva iclasda iştirak edirdi?
- Xeyr, o, otağından bayıra çıxmır. Səhər gəlir, üç saat dərsini keçib gedir.
- Bu gün işə gəlmişdi?
- Bəli, burada, otağındadır.
- Bildiyimizə görə, bu gün də kollektivdə narazılıq olub.
- Kollektivlə sağollaşıb otağıma gəlmişəm. Orada heç bir narazılıq olmayıb. Bir az kövrəldilər, dedim ki, mən də bu qəsəbədə yaşayıram, xeyir-şər məclislərində görüşəcəyik.
- Müəllimlər bildirirlər ki, sizin yerinizə müavinlərdən biri təyin ediləcək.
- Yalan söhbətdir. Direktorların işə qəbulu qaydaları var. Təlimdən keçmiş, əlavə imtahan verən şəxslər direktor təyin edilə bilərlər. Bu, sırf Təhsil Nazirliyinin səlahiyyətində olan bir şeydir. Əvvəlki vaxt deyil ki kiminsə arzusuyla təyinat olsun.
- Xeyrulla Haqverdiyev adlı bir keçmiş müavininiz də var. O da bugünkü iclasda iştirak etməyib. Səbəb nə olub?
- Xeyrulla Haqverdiyev sentyabrın 9-dan işə gəlmir.
- Səbəb nədir?
- Səbəb odur ki, mart ayında Ləman Babayeva "Kapital" bankdan beş min manat məbləğində kredit götürüb və Haqverdiyevi zamin saxlayıb. Aprel ayında isə "Chevrolet" firmasından avtomobil götürüb və 26 min manata onu zamin qoyub. Ümumiyyətlə müavin yoldaşı kimi onların çox isti münasibətləri var idi. Yəni, söhbət iş yoldaşı kimi olan münasibətdən gedir. Sonra Ləman Babayeva onu aldadıb ki, avqust ayında anamın krediti qurtaracaq, səni çıxarıb, anamı zamin yazdıracağam. Haqverdiyev Babayevanın müavinlikdən çıxarılma ehtimalının olduğunu biləndə onu zaminlikdən çıxartmasını xahiş edib. Babayeva da deyib ki, sən təhsil idarəsinə ərizə yaz, bildir ki, Elşən Qafarov məni məcbur elədi. Bildiyimə görə, hazırda Xeyrulla Haqverdiyev xəstəxanaların birində əsəblərindən müalicə alır, heç bir əlaqə saxlaya bilmirik.
- İşdən çıxarılıb?
- Xeyr, əlaqə saxlaya bilmirik.
- Niyə iki ay ərzində bununla bağlı tədbir görməmisiniz?
- Əməkhaqqı almır. Bir dəfə yoldaşları göndərdik, deyib ki, müalicə olunur. Anası Ləman Babayevayla danışandan sonra haqqımda şikayət ərizəsi yazıb. Razılaşma belə olub ki, əgər onlar mənim barəmdə ərizə yazmasalar, Babayeva krediti ödəməyəcək. Haqverdiyev sakit təbiətli biridir, 27 yaşı var, imtahanla bizə direktor müavini gəlib. Necə ola bilər ali təhsilli, böyük bir məktəbin direktor müavini olan şəxsi kimsə zamin durmaq üçün məcbur edir? Sadəcə, Haqverdiyev mənimlə məsləhətləşib, aylıq ödənişin 260 manat olduğunu demişəm və Babayevanın aylıq 480 manat əməkhaqqı aldığını bildirmişəm. Yəni 260 manat krediti Babayeva ödəyə bilərdi. Onsuz da "Kapital" bank ödənişi birbaşa kartdan çıxarır.
- Əgər bank krediti birbaşa kartdan çıxarırsa, niyə Ləman Babayevanın öz kartından tutmur?
- Ləman Babayevanın kartından tutur. Mən Xeyrullaya dedim ki, maraqlan gör, aylıq nə qədər ödənişdir, sonra razılıq ver.
- Əgər Babayeva kreditini ödəyirsə, Haqverdiyev niyə əsəb keçirsin?
- Onun psixikası bir az başqa cürdür. Əlaqə saxlaya bilmirik, telefonlara cavab vermir. Bir dəfə yoldaşları evinə göndərmişik, deyiblər ki, tam sağlamdır. Nəyə görə işə çıxmır, bilmirik. Ləman Babayeva ona deyib ki, sən işə gəlmə. Çox maraqlıdır, sentyabrın 9-dan təşkilat üzrə müavin, sentyabrın 14-də isə təlim-tərbiyə işləri üzrə müavin bülletenə çıxıb. Hər ikisi də sağlamdır, heç bir xəstəxanada müalicə olunmurlar.
- Ötən gün bizə təqdim olunan görüntülərdə Ləman Babayevanın qardaşı Vəfadar Abdullazadə məktəbə hücum edir. Bildiyimizə görə, həmin gün onunla sizin aranızda dava olub. Doğrudurmu?
- Avqustun 4-də Ləman Babayevanın anası və qardaşı məktəbə hücum çəkmişdilər. Mənə xəsarət yetirildi və bununla bağlı Xəzər Rayon Polis İdarəsində tibbi ekspertizanın rəyi də var. Videogörüntülərdə də görünür ki, o, bıçaq çıxardır, sadəcə digər şəxslər imkan vermədilər. Bununla bağlı cinayət işi açılıb, istintaq məni zərərçəkən tərəf kimi tanıyıb. Ləman Babayevanın arxasında olan şəxslər onu himayə edir. O vaxtdan cinayət işi süründürülür. Dəfələrlə vəsatət də vermişəm ki, Cinayət Məcəlləsinin 221-ci maddəsinin 3-cü bəndiylə cinayət işi açılmalıdır. Xidməti otağımda mənə xəsarət yetirilmişdi və buna baxmayaraq ona qarşı 221-ci maddənin 1-ci bəndiylə iş açılıb. Hazırda Vəfadar Abdullazadə Ləman Babayevanın hesabına azadlıqda gəzir. Srağagün Vəfadar Abdullazadə yenidən məktəbə hücum elədi və kameranın çəkdiyini görüb, içəri girmədi və kənardan təhqir etməyə başladı. "102" xidmətinə müraciət etsəm də, hələlik heç bir nəticə yoxdur. Bu gün aldığım məlumata görə, istintaqa təzyiqlər olur. Həmin işi Elmar Abdulov adlı müstəntiq aparırdı. Hazırda Ləman Babayevanın arxasında duran yüksək rütbəli polislər istintaqa təzyiq edirlər, həmin cinayət işini başqa müstəntiqə verirlər ki, iş bağlansın.
- Sizə konkret hansı xəsarət yetirilmişdi?
- Vəfadar Abdullazadə xidməti kabinetimdə yumruqla sifətimə zərbə endirmişdi. Bu barədə ekspertizanın da rəyi var.
- Ekspertizanın rəyində nə göstərilir?
- Sağ qulağın qançırı yazılmışdı. Dəqiq xatırlamıram.
- Bu xəsarətə görə hansı cəza düşdüyünü bilirsiniz?
- Üç ildən səkkiz ilə qədər həbs cəzası düşürdü. Amma indi cinayət işi açılan maddəyə görə, ən pis halda bir il müddətinə islah işlərinə cəlb edilə bilər. Bu, Ləman Babayevanın arxasında duran adamların ona verdiyi dəstəkdir. Dəfələrlə kollektivdə də deyib ki, mənim arxamda polis rəisi durub.
- Konkret kim?
- Azər Muradov Ləman Babayevaya deyib ki, sənin arxanda durmuşam, heç nədən qorxma. Bu, Ləman Babayevanın dedikləridir.
