Razi Nurullayev: "İcra başçılarının çoxu bilmir heç e-mail nədir"
"Bu yaxınlarda Bakı şəhər icra hakimiyyətinin internet səhifəsi ilə bağlı yazmışdım. Dünyanın ən gözəl şəhəri adlandırdıqları Bakının meriyasının internet səhifəsi üz qarasıdır. Həm üz qarası, həm də biabırçılıqdır, ləkədir. Yalnız bu fakta görə bir neçə nəfər vəzifəsindən getməli, mer isə istefaya göndərilməli və haqqında ciddi qanuni istintaq hərəkətləri başlamalı idi".
Ölkə.Az xəbər verir ki, bunu Azərbaycan Xalq Cəbhəsi partiyasının sədri Razi Nurullayev deyib. Partiya sədri qeyd edib ki, əksər rayon icra hakimiyyətlərinin də internet səhifələri bərbad gündədir, interaktivlik yoxdur, məlumat bazası yenilənmir, olan məlumatlar da, sadəcə ət tökür:
"Arıqlamaq istəyən şəxslər icra hakimiyyətlərinin internet səhifəsinə girib problemlərini həll edə bilərlər. Hər bir icra hakimiyyətinin səhifəsində elektron xidmətlər bölümü var, amma əksəriyyəti işləmir. Normal ölkələrdə, normal resurslarda icra başçısından tutmuş xırda məmura qədər hamısının şəkilləri, bioqrafiyası, əlaqə telefonları və elektron əlaqə vasitələri verilir. Bizdə isə cəmi bir e-mail verilir və o da fəaliyyətsiz olur".
Razi Nurullayev bildirib ki, vəzifəli şəxslərin əksəriyyəti heç bilmir ki, e-mail, Skype, Viber və WhatsApp nədir:
"Dünya artıq WhatsApp-la xidmət verir. Bizimkilərin isə başı qeyri-qanuni yollarla pul qazanmağa yönəlib. İkincisi, onların elektron vasitələrə allergiyası var, istəmirlər ki, əlçatan olsunlar. Ona görə də istəmirlər ki, adları da səhifədə olsun. Bu gün məmur gizlənir, kölgədə qalır ki, gözə dəymədən büdcə pullarını xımır-xımır yesin. Budurmu xalqa xidmət?".
