Beynəlxalq Tələbələr Günü qeyd edildi
Azərbaycan Tələbələr Birliyi (ATB) öz ənənəsinə sadiq qalaraq hər il olduğu kimi bu il də 17 Noyabr – Beynəlxalq Tələbələr Günü ilə bağlı silsilə tədbirlər həyata keçirmişdir.
Beləki, Birlik əsasən regionlarımızda yerləşən ali təhsil müəssisələrində tələbələrin iştirakı ilə müxtəlif mövzular ətrafında dəyirmi masalar təşkil etmişdir. Bundan başqa ATB Beynəlxalq Tələbələr Günü ərəfəsində üzv olduğu Avropa Gənclərinin Mobillik Şəbəkəsi çərçivəsində müxtəlif ölkələrdən olan gənclər təşkilatları ilə birgə tələbə mübadiləsi proqramına start vermişdir. Proqram çərçivəsində Azərbaycanda müxtəlif ali və orta-ixtisas təhsil müəssisələrində təhsil alan tələbələr xarici ölkələrdə təşkil olunan təlim və seminarlarda, habelə, təcrübə kurslarında ölkəmizi təmsil etmək şansı qazanacaqlar.
17 Noyabr – Beynəlxalq Tələbələr Günü və yeni başlanılan tələbə mübadiləsi proqramı ilə bağlı ATB sədri Elvin Aslanov da öz fikirlərini bildirmişdir. Elvin Aslanov qeyd etmişdir ki, “Beynəlxalq Tələbələr Gününün tarixi 1939-cu ildən başlayır. Bu tarix faşist qüvvələrinin dinc şəkildə öz etirazlarını bildirən tələbələri qətlə yetirməsi ilə bağlıdır. Təsadüfi deyil ki, bütün dünyada olduğu kimi məhz Azərbaycanda da tələbələr ölkəmizin müstəqillik qazanmasında əvəzsiz rol oynamışlar. Məhz 17 Noyabr tarixinə təsadüf edən Milli Dirçəliş Günündən başlayan Milli Azadlıq Hərəkatında, daha sonra Qarabağ döyüşlərində tələbələrimiz yaxından iştirak etmişlər. Hal-hazırda isə tələbələrimiz dünyada gedən informasiya döyüşünün ən aktiv iştirakçılarıdırlar. Onlar ölkəmizin, tariximizin, mədəniyyətimizin dünya ictimaiyyətinə tanıdılmasında əvəzsiz rol oynayırlar. Biz də ATB olaraq bu işin daha effektiv təşkil olunması üçün Avropa Gənclərinin Mobillik Şəbəkəsi çərçivəsində tələbə mübadiləsi proqramına start vermişik. İnanırıq ki, bu proqram tələbələrimizə ölkəmizin tanıdılması, həmçinin, öz bilik və bacarıqlarının artırılması baxımından çox böyük yardımçı olacaqdır. O ki qaldı, Beynəlxalq Tələbələr Günü ərafəsində keçirilən tədbirlərə, bu artıq Azərbaycan Tələbələr Birliyində bir ənənəyə çevrilib. Beləki, biz hər il 17 noyabr ərəfəsində müxtəlif mövzularla bağlı universitetlərimizdə tələbələrlə görüşlər keçiririk. Əsas məqsədimiz bu görüşlərə müxtəlif ictimai-siyasi xadimləri dəvət edərək, tələbələrin bu şəxslərlə aktiv ünsiyyətini təşkil etməkdir. Bu tədbirlər, həmçinin, tələbələrimizə öz sözlərini demək imkanı da verir. Biz hər il keçirdiyimiz bu tədbirlərdə tələbələrin səsləndirdikləri fikir və ideyalardan yola çıxıb öz gələcək fəaliyyət və layihələrimizi planlaşdırırıq. İnanıram ki, gələcək illərdə bu tədbirlərimiz daha geniş miqyasda və daha geniş tələbə qruplarını əhatə etməklə keçiriləcəkdir”.
