AXCP sədrinin müavini: "O məmurların ailələrini həmin binaya göndərmək lazımdır"
"Yadınızdadırsa ötən ilin may ayında Bakının Azadlıq prospektində məmur səriştəsizliyi və özbaşınalığı nəticəsində 16 mərtəbəli bina yanmış və 20-ə yaxın adam ölmüşdü. Xatırladım ki, o hadisədən əvvəl də Xətai rayonu Zığ şosesində eyni hadisə baş vermişdi. Amma qarşısını çox gec aldılar. Onlarla insanın canına qıydıqdan sonra..."
Ölkə.Az xəbər verir ki, bu sözləri Azərbaycan Xalq Cəbhəsi Partiyasının (AXCP) sədr müavini Ehtiram Mehdiyev deyib. O qeyd edib ki, bu gün buna bənzər daha bir hadisənin şahidi oluruq:
“Xətai rayonu, Gəncə prospekti, 20A ünvanındakı qəzalı binadan söhbət gedir. Axı bu məmurlar nəyi gözləyirlər. Bina 18 metr sürüşüb, ağır qəzalı vəziyyətdədir. Hər an yerlə-yeksan ola bilər. Sakinlər hər an bina uçacaq təhlükəsi ilə yaşayırlar. Hətda bir neçə ailə evinə girməkdən qorxur.
Gərək o biganə yanaşan məmurları ailələri ilə birlikdə bir günlük o binaya göndərəsən və qorxunun nə olduğunu bilələr. Məsuliyyətsiz məmurlar unutmasınlar ki, bina uçduqdan sonra, onlarla insan öldükdə birbaşa məsuliyyəti onlar daşıyacaqlar. İnsanları bu vəziyyətdə saxlamaq düzgün deyil. Hökumət vətəndaşına sahib çıxmalıdır. Fövqəladə vəziyyət yaranmamış (əslində yaranıb) insanları təcili o binadan yeni evlərə köçürmək lazımdır.
Hər kəsdən bu məsələni gündəmdə saxlamağı xahiş edirəm. AXCP Sədri Razi Nurullayev də bu məsələni öz "facebook" səhifəsində müzakirəyə çıxartmışdı. Lakin, çox təssüflər olsun ki, əlimizdə sosial şəbəkələrdə yazmaqdan başqa artıq imkanlarımız yoxdur. Sakinlər isə hələ də ümidlə bu problemin həllini gözləyirlər”.
