Asim Mollazadə: “Azərbaycan Xocalı qatillərinin Rusiyadan alınmasına nail olmalıdır”

“Ermənistan Rusiyanın hərbi əyalətidir və buna görə Azərbaycan Rusiya ilə danışıqlar aparmalıdır”.

Ölkə.Az-ın məlumatına görə, bu fikirləri Milli Məclisin bu gün keçirilən plenar iclasında çıxışı zamanı millət vəkili Asim Mollazadə bildirib.

Deputat qeyd edib ki, rəsmi Bakı Dağlıq Qarabağ münaqişəsinin həlli ilə bağlı Ermənistanla deyil, Rusiya ilə danışıqlara başlamalıdır. Onun sözlərinə görə, indi Ermənistan müstəqil olmadığından, düşmən ölkə danışıqlar prosesində imitasiya edir:

“Yaranmış vəziyyəti nəzərə alaraq Azərbaycan Ermənistanla münaqişənin həlli ilə bağlı aparılan danışıqlardan imtina edərək, ermənlərin həqiqi ağası olan Rusiya ilə Qarabağ münaqişəsinin həlli ilə bağlı danışıqlara başlamalıdır. Xocalı faciəsi günahkarlarının əksəriyyəti də məhz Rusiyada gizlənir. Ona görə də təklif edirəm ki, Azərbaycan Rusiyaya müraciət edərək Xocalı soyqrımını törədən 366-cı alayın hərbçilərinin və orada gizlənən erməniləri Azərbayacana təhvil verməlidir. Bilirsiniz ki, Azərbaycanla Rusiya arasında cinayətkarların ekstradisyası haqqında müvafiq saziş var. Biz bu sazişdən istifadə etməklə Rusiyadan bu cinayətkarların Azərbaycana təhvil verilməsinə və onlar üzərində xarici hakimlərin iştirakı ilə məhkəmənin təşkil olunmasına nail olmalıyıq. Biz xarici hakim və vəkillərin iştirakı ilə belə bir məhkəməni təşkil etməklə Xocalı soyqrımının beynəlxalq hüquqi müstəvidə tanınmasına nail ola bilərik. Əgər Rusiya iki ölkə arasında imzalanan sazişə əməl etməsə, o zaman bu sazişdən imtina etməlidir”.

Zaur Əziz
Ölkə.Az