Deputatlar bir-birini təhqir etdi
“Sosial şəbəkələrdə məndən, Fəzail Ağamalıdan və Fazil Mustafadan çox söyülən deputat yoxdur”.
Ölkə.Az-ın məlumatına görə, bunu Milli Məclisin bu gün keçirilən iclasında çıxışı zamanı millət vəkili Aqil Abbas bildirib.
Deputat deyib ki, bəzən onun hər hansı müsahibəsi, açıqlaması sosial şəbəkələrdə konteksdən çıxarılaraq yayımlanır və ona cavab olaraq şərhlər yazılır:
“Bu şərhlərdə kim nə istəyirsə, yazır. Məni, həmkarlarımı təhqir edirlər. Bunun əsas səbəbi bizim demədiyimiz fikirlərin başqa cür təqdim edilməsidir. Bəzən biz müsahibə verən kimi təhqir olunuruq. Bütün bunlara son qoyulmalıdır, sosial şəbəkələrdə təhqir və böhtanlara ciddi nəzarət olunmalıdır. Təhqir və böhtana yol verən saxta profillər belə araşdırılıb cəzalandırılmalıdır”.
Milli Məclisin sədri Oqtay Əsədov isə deputatları müsahibələr verəndə diqqətli olmağa çağırıb:
“Mən Hadi Rəcəbliyə dəfələrlə demişəm ki, müsahibə verəndə görün ki, kimə, hansı jurnalistlərə və saytlara müsahibə verirsiniz. Bu gün bir çox deputatlar gündəmdə qalmaq üçün müsahibə verməyə can atırlar. Əl çəkin də bu cür hərəkətlərdən. Mən spiker kimi Milli Məclisin deputatlarını qorumağa çalışıram”.
Millət vəkili Fəzail Ağamalı isə deputat həmkarı Aqil Abbasa kəskin iradını bildirib.
F.Ağamalı deyib ki, Aqil Abbas neçənci dəfədir danışıqlarına fikir vermir:
“Aqil Abbasın səviyyəsi çatmır ki, bizə dərs keçsin. Hər dəfə də o hərəkətlərini, danışıqlarını bilməyən davranışlar nümayiş etdirir. Artıq o həddini aşıb. Xahiş edirəm, cənab Sədr, ona xəbərdarlıq edin”.
F.Ağamalı internet resurslarında ayrı-ayrı insanların şəxsiyyətinin alçaldıldığını da söyləyib:
“Bütün bunlara qarşı sərt tədbirlər görülməlidir. Millət vəkilləri heç nədən çəkinmir. Çünki onların fəaliyyəti şəffafdır. Millət vəkilləri ictimaiyyətə digər qurumlardan daha açıq şəxslərdir. Ona görə də tez-tez jurnalistlər bizə müraciət edib, açıqlama alırlar. Biz də jurnalistlərə hamının normal başa düşəcəyi formada cavab veririk. Bunu ayrı cür təqdim etməyə ehtiyac yoxdur”.
Zaur Əziz
Ölkə.Az
