Deputatdan Tarif Şurasının qərarı ilə bağlı

Ana Vətən Partiyasının (AVP) sədri, millət vəkili Fəzail Ağamalı Tarif Şurasının enerji qiymətlərinin artırıkması ilə bağlı qərarına etirazını bildirib.

Ölkə.Az-ın məlumatına görə, F.Ağamalı bu gün Milli Məclisdə keçirilən Azərbaycanın 2017-ci il üzrə dövlət büdcəsi layihəsinin müzakirəsi zamanı deyib ki, Tarif Şurasının məlum qərarı ilə kənd təsərrüfatı sahəsinin inkişafı istiqamətində aparılan siyasətdə uyğunsuzluq var:

“Gələn il büdcədən kənd təsərrüfatı sahəsinə 35 milyon manat vəsait ayrılıb. Bununla heç nə etmək mümkün deyil. Tarif Şurasının qərarı ilə kənd təsərrüfatı sahəsinin inkişafı üçün aparılan siyasət arasında uyğunsuzluq var. Elektrik enerjisi və təbii qazın qiyməti artırılıb. Bir sahibkar istixana üçün əvvəl 25 min manat ödəyirdirsə, indi 50 min manat ödəməli olacaq. Bu baxımdan da tərəvəz məhsullarının istehsalında azalma olacaq. Nəzərə alaq ki, həmin məhsullar xarici bazara da çıxarılırdı və ölkəyə valyuta gətirirdi”.

F.Ağamalı təklif edib ki, enerji və qaz üçün qoyulan kvota artırılsın:

“Təklif edərdim ki, enerji üçün 250 kilovat saat 500 kilovat saat, 1500 kubmetr qaz isə 3000 kubmetr olsun. Rayonlarda insanlar evlərini daha çox qazla isidir. Verilən kvota buna təsir edir. Həmçinin Bakının bir çox yerində mərkəzləşmiş istilik sistemi olmadığından onlara da artım təsir edəcək”.

Zaur Əziz