MTN-nin istefada olan zabiti: "Ölkədə ən böyük təhlükə radikal dindarlardır"

"Azərbaycanda təhlükə radikal dindarlardadır".

Bu sözləri Ölkə.Az-a Milli Təhlükəsizlik Nazirliyinin istefada olan polkovnik-leytenantı İlham İsmayıl deyib.

İlham İsmayılın sözlərinə görə, Azərbaycanda sivil müxalifət və digər qüvvələrin sıradan çıxarılması bunun səbəbidir. Radikal dindarlar ölkədə çox gizli təşkilatlanıblar:

"İranın təsiri altında olan radikal şiələr və daha radikal sayılan- vəhabi, sələfi adlı qruplaşmalar daha təhükəlidir. Hər iki qrup çox gizli təşkilatlanıb. Onların ölkədə böyük dayaqları olmasa da, xaricdən maliyyələşirlər".

İstefada olan kəşfiyyatçı bildirdi ki, hər dəfə dini tədbirlər olanda biz onların inanclı insanlar dediyimizdən daha çox nə qədər radikal dindar və özlərini büruzə verməyən adamlar olduğunu görmüşük:

"Çox təəssüf ki, sivil siyasi müxalifət sıradan çıxarıldıqca, ölkədəki iqtisadi böhran nəticəsində yaranan etiraz dalğası radikal dindarları ortaya çıxaracaq".

İlham İsmayıl: "İŞİD Suriyadan, İraqdan sıxışdırıldıqca, məğlubiyyətə uğradıqca terrorçular geriyə çəkiləcəklər. Geriyə çəkiləndə Azərbaycana aid olanlar Azərbaycana, Şimali Qafqaza aid olanlar Şimali Qafqaza qayıdacaq. Bu istiqamətdə yenidən hansısa dalğa yarana bilər. Xalq arasında onların böyük dayağı olmasa da, güc kimi ortaya çıxacaq ən böyük təhlükə radikal dindarlar olacaq".

Qeyd edək ki, bir neçə gün öncə Dövlət Təhlükəsizliyi Xidmətinin (DTX) həyata keçirdiyi əməliyyat-axtarış tədbirləri nəticəsində, 1978-ci il təvəllüdlü, Azərbaycan Respublikasının vətəndaşı, 2007-ci ildə zərərsizləşdirilmiş “Əbu Cəfər” ləqəbli Naif əl-Bədəvinin rəhbərlik etdiyi terrorçu təşkilatın tərkibində fəaliyyət göstərdiyinə görə məhkum olunmuş Cami Emin Əzizağa oğlunun cari ilin əvvəlində azadlığa çıxdıqdan sonra yenidən ölkə hüdudlarından kənarda aparılan silahlı münaqişələrdə iştirak edən qanunsuz silahlı birləşmələrin və beynəlxalq terrorçu təşkilatların nümayəndələrinin tabeçiliyini qəbul edərək əlaqəli fəaliyyət göstərməsinə, habelə Azərbaycan ərazisində odlu silahdan və partlayıcı qurğulardan istifadə etməklə terror-təxribat törədilməsini planlaşdırmasına əsaslı şübhələr müəyyən edilib. Emin Caminin saxlanılması üzrə əməliyyat tədbiri həyata keçirilərkən, sonuncu müqavimət göstərərək üzərində olan “şəhid kəməri”ni partlatmağa cəhd edib, cavab tədbiri olaraq xüsusi əməliyyat qrupu tərəfindən məhv edilib.

Səxavət Məmməd
Ölkə.Az