Azər Həsrət: “Hər “reket”in arxasından yüksək rütbəli məmur çıxırdı”

Əməkdar jurnalist və hüquq müdafiəçisi Azər Həsrət Dövlət Təhlükəsizlik Xidməti (DTX) əməkdaşlarının “Azərbaycan” nəşriyyatında “reket jurnalist” fəaliyyəti ilə məşğul olan şəxslərə qarşı keçirdiyi əməliyyata və ötən gün “Gündəlik Bakı” qəzetinin təsisçisi və baş redaktoru Habil Vəliyevin saxlanılmasına münasibət bildirib.

Ölkə.Az-ın məlumatına görə, A.Həsrət bu əməliyyatı alqışladığını söyləyib:

“Axır ki, DTX çoxdan gözlədiyimiz əməliyyatlara başladı. Bunu alqışlayırıq və dəstəkləyirik. Azərbaycan mediası mütləq şəkildə ondan sui-istifadə edənlərdən təmizlənməlidir. Biz Mətbuat Şurasında bu məsələni həll etməyə çalışsaq da illərdir ki, bir uğur qazana bilmirdik. Çünki hər bir “reket”in arxasından çox yüksək rütbəli məmur, ya da dövlət qurumu çıxırdı, önümüzü kəsirdi və beləcə də jurnalistikamız hər keçən gün abırdan düşürdü. Ümid etmək istərdim ki, DTX bu prosesi sonadək davam etdirəcək və nəhayət ki, mediamız normal və sayğılı bir platformaya dönə biləcək”.

Zaur Əziz
Ölkə.Az