YAP-çı deputat: “Xalqın boğazından tutub çətinliyə sürükləmək doğru deyil”

“Dolları “qara bazar”larda istədikləri qiymətə satırlar, ancaq banklardan dollar almaq mümkün deyil”.

Ölkə.Az-ın məlumatına görə, bunu Yeni Azərbaycan Partiyasının (YAP) üzvü olan millət vəkili Yevda Abramov Milli Məclisin bu gün keçirilən plenar iclasında çıxışı zamanı bildirib.

Y.Abramov deyib ki, bu işə ciddi nəzarət olunmalıdır:

“Metro stansiyalarının çıxışlarında dollar satılır. Bir gündə dollar kəskin fərqlə satılır. Bu adamların maşınlarında bu qədər dollar haradandır? Mən danışıram, bəziləri incik düşür. Amma korrupsiya ilə mübarizə aparmaq lazımdır. Məmurların bahalı villaları haradandır? Dağda, bağda hər yerdə villaları var. 2017-ci il də çətin olacaq, məmurlar xalqa yaxın olmalıdırlar”.

YAP-çı deputat Tarif Şurasının elektrik enerjisi və təbi qazın qiymətlərinin qaldırılması ilə bağlı qərarına da sərt etiraz edib:

“Mən hər zaman xalqın problemlərini parlamentdə qaldırmışam, müzakirə etmişəm. Ona görə də bu gün deyirəm ki, kiminləsə şəxsi problemim yoxdur. Amma maraqlıdır ki, Tarif Şurası qərar qəbul edərkən hansı arqumentləri əsas götürür? Enerjinin və təbii qazın qiymətinin artırılması ilə razı deyiləm. Deyirlər, bu qərar aztəminatlı ailələrə təsir etməyəcək. Mən buna inanmıram. Azərbaycanda əhalinin yoxsulluq səviyyəsi yüksəkdir, ona görə də elektrikdən, təbii qazdan az istifadə edirlər. Belə bir vaxtda xalqın boğazından tutub çətinliyə sürükləmək doğru deyil. Bilmirəm, məmurlar, bəzi insanlar qərar qəbul edəndə xalqı düşünürlərmi? Məncə, düşünmürlər. Əgər düşünsəydilər, belə qərar verməzdilər”.

Zaur Əziz
Ölkə.Az