Yardımlar birbaşa özlərinə verilsin

"Qaçqın və məcburi köçkünlərin statusuna yenidən baxılsın. Dövlət yardımları birbaşa özlərinə verilsin". Bu təkliflə Milli Məclisin hüquq siyasəti və dövlət quruculuğu komitəsinin üzvü millət vəkili Çingiz Qənizadə çıxış edib. Millət vəkili buna əsas kimi qaçqın və məcburi köçkünlər üçün ayrılan kommunal ödənişlərdə yayındırılma və sui-istifadə hallarının aşkarlanmasını göstərib.

Kommunal güzəştlər üçün dövlət tərəfindən ödənilən pul Qaçqın və Məcburi Köçkünlər Üzrə Dövlət komitəsinə yox, birbaşa bu kateqoriyadan olan vətəndaşların özlərinə ödənilsin.

Bu təkliflə çıxış edən millət vəkili Çingiz Qənizadə buna səbəb kimi Hesablama Palatasının Qaçqın və Məcburi Köçkünlərin İşləri Üzrə komitəndə bu vəsaitdən sui-istifadə hallarını aşkarlamasını göstərir. Millət vəkili deyir ki, bir çox hallarda kommunal ödənişi qəbul edən qurumlara ödənilən məbləğlər ayrılan vəsaitdən daha az olub. Nəticədə 283 min manat büdcə yeyintisi, 267 min manat isə vergidən yayınma halı qeydə alınıb.

Milli məclisin Hüquq siyasəti və dövlət quruculuğu komitəsinin üzvü təklif edir ki, "Qaçqınların və məcburi köçkünlərin statusu haqqında" qanuna yenidən baxılsın və müvafiq dəyişikliklə onlara ödənilən vəsait birbaşa həmin şəxslərə verilməlidir.

Əgər təklif qəbul olunsa qaçqın və məcburi köçkünlər onlara edilən kommunal güzəştlərlə bağlı ayrılan vəsaiti birbaşa özləri alacaqlar. Çingiz Qənizadənin fikrincə bu addımın atılması külli miqdarda dövlət vəsaitinin büdcədə qalaraq ehtiyac olan digər istiqamətlərə ayrılmasını təmin edəcək.

Qaçqın və Məcburi Köçkünlərin işləri üzrə Dövlət Komitəsinin sədri Əli Həsənov bu təklifə münasibət bildirib. "O, deyib ki, Azərbaycan əhalisinin hansı təbəqəsinə güzəşt verir, hansı hissəsinə yox, bunu dövlət bilər. Belə açıqlamalar qaçqın və məcburi köçkünlərdə narazılıq yaradıb. Onları niyə incitməliyik" deyə Əli Həsənov bildirib.

Ölkə.Az xezerxeber.az-a istinadən mövzu ilə bağlı daha ətraflı videomaterialı təqdim edir.