Baldızını qaçıran Cəlilabad sakini həyat yoldaşıyla

Baldızını qaçıran Cəlilabad rayon sakini Ələmdar Məmmədov həyat yoldaşıyla barışıb.

Bu barədə Ölkə.Az-a açıqlamasında qaçırılan qızın əmisi Rahim Yusubov məlumat verib. O, Cəlilabad rayon Polis Şöbəsində Ə.Məmmədova cinayət işi açılmasıyla bağlı xəbərə də münasibət bildirib:

"Ələmdara necə cinayət işi açılıb ki, hələ tutulmayıb? O adam evinə gəlib-gedir, ailəsiylə danışır. Amerikaya qaçdı bu? Nə oldu, bu boyda polis bir nəfəri tuta bilmədi? Şikayətçinin biri mənəm, biri də qızın atasıdır. Elə biz üç ay gedib-gəldik, əlimizi çəkəndən sonra cinayət işi açıldı?"

Xatırladaq ki, bu il sentyabrın 23-də Cəlilabadın Məmmədrzalı kənd sakini 15 yaşlı Gülbahar Əliyevanı (red-ad şərtidir) qaçıran rayon sakini Ələmdar Məmmədov barədə cinayət işi başlanıb. Bu barədə Trend-ə Cəlilabad rayon Polis Şöbəsindən məlumat verilib.

Məlumata görə, azyaşlı G.Əliyeva tapılandan bir müddət sonra polisə ifadə verib və bacısının həyat yoldaşı, 1990-cı il təvəllüdlü Məmmədov Ələmdar Əli oğlu tərəfindən qaçırılaraq Bakı şəhərinə aparıldığını bildirib. Azyaşlının ifadəsindən sonra Cəlilabad rayon Polis Şöbəsində Cinayət Məcəlləsinin 152-ci (On altı yaşına çatmayan şəxslə cinsi əlaqədə olma və ya seksual xarakterli digər hərəkətlər etmə) maddəsilə cinayət işi başlanıb və təqsirləndirilən şəxs barəsində axtarış elan edilib.

Qeyd edək ki, G.Əliyeva bu il sentyabrın 23-də Cəlilabad rayonunun Mikayıllı kənd sakini, 1990-cı il təvəllüdlü Ə.Məmmədov tərəfindən Bakının Qaradağ rayonunun Puta qəsəbəsinə qaçırılıb. Azyaşlı oktyabrın 31-də evlərinə qayıdıb və bacısının həyat yoldaşı tərəfindən qaçırıldığını bildirib.

İntiqam VALEHOĞLU
Ölkə.Az