Politoloq: "Dilqəm elə girovluqdan səslənsə, onun vətəndaşlıq müddətini uzada bilərlər"

Ermənilər tərəfindən girov götürülən azərbaycanlı Dilqəm Əsgərovun Rusiya Federasiyası vətəndaşlığını təsdiq edən sənədin etibarlılıq müddətinin bitməsinə saylı günlər qalıb. Bəs görəsən, bu etibarlılıq müddətinin bitməsi girovumuzun taleyinə necə təsir edəcək? Rusiyanın susmasına əsas səbəb barmaqla sayılacaq həmin günlərin ötüb keçməsini gözləməkdirmi?

Ölkə.az-ın girovumuzla bağlı səsləndirdiyi sualları politoloq Mübariz Əhmədoğlu cavablandırıb.

"Əslində bu proses kökündən saxda prosesdi. Bu mövzuda Rusiyanın hər hansı mövqe bildirməməsi, vətəndaşını müdafiə etməməsinin səbəbini də başa düşürəm. Rusiya nə adla deyəcək? Axı o, bu məsələni heç rəsmiləşdirə də bilməz. Rusiya Dağlıq Qarabağa necə müraciət etsin? Ya politoloji prizmadan, ya da psixoloji prizmadan çalışırlar ki, Dağlıq Qarabağın adı daha çox hallansın. Ona görə, mən belə başa düşürəm ki, Rusiya altdan-altdan öz işini görür. Əgər deyilibsə ki, Dilqəm Rusiya vətəndaşıdır və Rusiya tərəfi bunu təkzib etməyibsə, bu artıq ermənilər üçün böyük mesajdır. Amma Rusiya üzə çıxıb vətəndaşını müdafiə edə bilməz, heç bu məsləhət də deyil, çünki müəyyən vurğular ermənilərin xeyrinə dəyişə bilər.

Bu çox həssas məsələdir. Əgər biz o məsələnin həllini, düsturunu tapıb Rusiyaya, həmçinin başqa ölkələrə versək, onlar məsələyə "girişə" bilərlər. Ümumilikdə bura iki beynəlxalq qrum birbaşa müdaxilə edə bilər ki, bunlardan biri Beynəlxalq Qızıl Xaç Komitəsi, digəri ATƏT-in MİNSK qrupudur. Başqa ölkələrin müdaxilə etməsi heç məsləhət də deyil.

-Bir neçə gündən sonra Dilqəmin Rusiya vətəndaşlığını təstiq edən sənədin etibarlılıq müddəti bitir. Bu vəziyyət hər hansısa fərq yarada bilər?

Mən belə başa düşürəm ki, Rusiya bu dəqiqə çalışır ki, MDB məkənında olan vətəndaşlar ora axın etsin. Xüsusi proseduarlar var ki, onlarla vətəndaşlığı uzatmaq rahatlıqla baş verir. Məncə, Dilqəm elə girovluqdan səslənsə, onun vətəndaşlıq müddətini uzada bilərlər".

Qeyd edək ki, Dilqəm Əsgərov anasının məzarını ziyarət etmək üçün öz dədə-baba torpağına gedərkən "diversant" ittihamı ilə ermənilər tərəfindən girov götürülmüşdür.

Fatimə İbrahimova
Ölkə.az