İtin belə üfunətdən başını yan çevirərək keçdiyi "İran bazarı"
Cəlilabad rayonunda İran bazarı kimi tanınan Rizvan Ticarət Mərkəzinin ətrafı zibilxanaya çevrilib.
Ölkə.Az xəbər verir ki, bazarın qarşı tərfində yerləşən avtomobil parkının yarısı kanalizasiya sularına qərq olub. Bazar və ətraf ərazilər üfunət içindədir. Son günlər yağan qar və yağış sularının da burada toplanması avtomobil parkında iri gölməçə yaradıb.
Bir müddət əvvəl suların axıdılması üçün ərazidə kiçik kanal qazılsa da, bunun köməyi olmayıb. Əksinə vəziyyət daha da çətinləşib. Avtomobillər su ilə dolu olan kanala düşür. Nəticədə maşınlar sıradan çıxır.
Bazar rəhbərliyi və rayon İcra Hakimiyyəti hələ ki, problemləri ya görmürlər, yaxud da, görmək istəmirlər. Problemin mövcudluğundan uzun zaman keçməsinə baxmayaraq, məsələ ilə bağlı heç bir tədbir görməyib.
Çox təəssüflər ki, insanlar bir tikə çörək ucbatından bu üfunət iyinə dözməli olurlar. Amma bu iyə it belə təhəmmül etməz!
Ziya Səccad
