Ölkə.Az yazdı, şəhidin adına olan məktəbin tikintisinə başladılar

Ölkə.Az-ın ictimailəşdirdiyi daha bir problem həllini tapıb. Belə ki, Şamaxıda şəhid Aslan Şirinovun (Sərdaroğlu) adını daşıyan yeni məktəb binasının tikintisinə başlanılıb.

Xatırladaq ki, rayonun Meysəri kəndindən olan, 1992-ci ilin fevralında Ağdərədə gedən döyüşlərdə itkin düşmüş şəhid Aslan Şirinovun adını daşıyan məktəbin binası köhnəldiyi üçün, yeni məktəb binasının inşasına maliyyə ayrılsa da, tikintisi gecikdirilirdi. Daha doğrusu aidiyyatı qurumlar binanı tikmək üçün torpaq tapa bilmədiklərini qeyd edirdilər. 

Məktəbin direktoru Vidadi Hümbətov əməkdaşımızla söhbətində bildirib ki, tikintiyə təxminən on gün əvvəl başlanılıb:

"Bütün kollektivimiz sevinclidir. Bu məsələdə sizin də böyük rolunuz oldu. İnanırıq ki, yeni binamız, şəraitimiz şagirdlərin təhsilə olan marağını bir az da artıracaq".

İntiqam VALEHOĞLU
Ölkə.Az